🔹 সাংসদ পত্নীৰ পাকিস্তান লিংক : পুনৰ দিল্লীলৈ যাব এছআইটি
বিশেষ বাৰ্তা, ৪ এপ্রিল : চিৰবৈৰী ৰাষ্ট্র পাকিস্তানৰ সৈতে সাংসদ গৌৰৱ গগৈৰ পত্নী এলিজাবেথ কলবার্নৰ সম্পর্কক লৈ অসম আৰক্ষীৰ বিশেষ অনুসন্ধান গোট, চমুকৈ এছআইটিয়ে তদন্ত অব্যাহত ৰাখিছে৷ বিগত সময়ছোৱাত দুবাৰ দিল্লীলৈ যোৱা এছআইটিৰ দলে গোচৰটোৰ তদন্তৰ বাবে তৃতীয়বাৰ দিল্লী অভিমুখে যোৱাৰ প্রস্তুতি চলাইছে৷ উল্লেখ্য যে শেহতীয়াকৈ দিল্লীলৈ যোৱা এছআইটিৰ দলটোৱে গুজৰাটৰ আহমেদাবাদলৈও গৈ স্থপতিবিদ মিহিৰ ভাটক জেৰা চলাইছিল৷ দিল্লীস্থিত লীড ইণ্ডিয়া নামৰ সংস্থাটোত কাম কৰি থকা অৱস্থাত এলিজাবেথ কলবার্নৰ সহকর্মী আছিল মিহিৰ ভাট৷ পাকিস্তানৰ ইছলামাবাদ ভ্রমণৰ সময়ছোৱাত এলিজাবেথ কলবার্নৰ সৈতে চিনা–পৰিচয় হৈছিল বুলি এছআইটিৰ জেৰাত সদৰী কৰিছিল মিহিৰ ভাটে৷ ইয়াৰ বাহিৰেও উক্ত গোচৰটো সন্দর্ভত বহু গুৰুত্বপূর্ণ নথিপত্রও মিহিৰ ভাটৰ পৰা জব্দ কৰিছিল এছআইটিয়ে৷ বিশেষ সূত্রৰ পৰা জানিব পৰা মতে, এছআইটিয়ে এলিজাবেথ কলবার্নৰ পাকিস্তানৰে সম্পর্কক লৈ বহু তথ্য–প্রমাণ লাভ কৰিছে৷ এলিজাবেথ কলবার্নে কেইবাবাৰো পাকিস্তান ভ্রমণ কৰাৰ তথ্য লাভ কৰিছে এছআইটিয়ে৷ এলিজাবেথ কলবার্নৰ পাছপ’ৰ্ট, ইমিগ্রেচন সম্পর্কীয় বহু তথ্যপাতি ইতিমধ্যে এছআইটিয়ে সংগ্রহ কৰিছে৷ আনুষ্ঠানিকভাৱে এই সন্দর্ভত এছআইটিয়ে মন্তব্য নকৰিলেও বহু গুৰুত্বপূর্ণ তথ্য–প্রমাণ তদন্তকাৰী দলটোৱে সংগ্রহ কৰিছে৷ মন কৰিবলগীয়া যে পাকিস্তানৰ পৰিকল্পনা আয়োগৰ তদানীন্তন অধ্যক্ষ আলী তৌকিৰ শ্বেখ জড়িত হৈ থকা এক স্বেচ্ছাসেৱী সংগঠনৰ সৈতে দীর্ঘদিনে জড়িত হৈ আছিল এলিজাবেথ কলবার্ন৷ ইয়াৰ আলম লৈয়েই ২০১৪ চনৰ পৰা ২০১৮ চনলৈ আলী তৌকিৰ শ্বেখে কেইবাবাৰো ভাৰত ভ্রমণ কৰিছিল৷ ভাৰত ভ্রমণৰ এই সময়ছোৱাতে আলী তৌকিৰ শ্বেখে পাকিস্তান চৰকাৰৰ এটর্নী জেনেৰেলসহ কেইবাজনো উচ্চপদস্থ বিষয়াক নিজৰ লগত লৈ আহিছিল৷ ২০১৮ চনলৈ আলী তৌকিৰ শ্বেখে অসমৰ বিভিন্ন বিষয় বিশেষকৈ অনুপ্রৱেশ, এনআৰচি আদি সন্দর্ভতো সামাজিক মাধ্যমযোগে মত প্রকাশ কৰিছিল৷ এছআইটিয়ে এই সন্দর্ভত ইতিপূর্বে ড০ নূপুৰ বৰুৱা, অনির্বাণ গাংগুলী, পৰিৱেশ কর্মী ছায়া ভাণ্টী আদিকে ধৰি কেইবাজনো লোকক মাৰাথন জেৰা চলাইছে৷ জেৰাত আটাইকেইজন লোকে বহু কথাই তদন্তকাৰী বিষয়াৰ আগত সদৰী কৰাৰ লগতে বহু গুৰুত্বপূর্ণ তথ্য–প্রমাণো দাখিল কৰিছে৷ সূত্রটোৱে দাবী কৰা মতে, তদন্ত সম্প্রতি দ্রুতগতিত আগবাঢ়ি আছে৷ কিছুসংখ্যক নথিপত্র এতিয়াও এছআইটিয়ে লাভ কৰিবলৈ বাকী আছে৷ সেইখিনি পোৱাৰ পিছতে এছআইটিয়ে সম্পূর্ণ প্রতিবেদন চৰকাৰক দাখিল কৰিব বুলি জানিব পৰা গৈছে৷ পৰৱর্তী সময়ত সাংসদ গৌৰৱ গগৈ আৰু এলিজাবেথ কলবার্নকো জেৰা চলোৱাৰ সম্ভাৱনা নথকা নহয় বুলিও সূত্রটোৱে লগতে মন্তব্য কৰিছে৷