নিয়মীয়া বাৰ্তা ডিজিটেল, ২৭ মাৰ্চঃ গুৱাহাটী চিকিৎসা মহাবিদ্যালয় হাস্পতাল (জিএমচিএইচ)ত সংঘটিত হ’ল এক আজব ঘটনা৷ খুৰাকৰ মৃতদেহ বুলি এজন যুৱকে আন এজন লোকৰ শৱ লৈ যোৱা ঘটনাক কেন্দ্র কৰি উদ্ভৱ হয় এক আজব পৰিস্থিতিৰ৷ উল্লেখ্য যে জিএমচিএইচলৈ অনাৰ পথত শেহতীয়াকৈ মৃত্যু হৈছিল নির্মল দাস নামৰ এজন লোকৰ৷ এই লোকজনৰ মৰণোত্তৰ পৰীক্ষা সম্পন্ন হোৱাৰ পিছত মৃতদেহ পৰিয়ালৰ লোকে চমজি লোৱাৰ পূর্বেই জগদীশ দাস নামৰ এজন যুৱকে নিজৰ খুৰাকৰ মৃতদেহ বুলি নির্মল দাসৰ শৱ লৈ নিজ গৃহ নলবাৰীলৈ যাত্রা কৰে৷ এনেদৰে মৃতদেহ লৈ যোৱাৰ ক্ষন্তেক পিছতেই নির্মল দাসৰ পৰিয়ালে মৃতদেহ বিচাৰি মৰণোত্তৰ পৰীক্ষা গৃহত উপস্থিত হোৱাত চিকিৎসালয় কর্তৃপক্ষই আন এটা মৃতদেহ দেখুৱাই দিয়ে যদিও উক্ত মৃতদেহটো নির্মল দাসৰ নহয় বুলি পৰিয়ালৰ লোকে অৱগত কৰাত হাহাকাৰ পৰিস্থিতিৰ সৃষ্টি হয়৷ উল্লেখ্য যে মৰণোত্তৰ পৰীক্ষা গৃহত সম্পন্ন হৈছিল নলবাৰীৰ কটলা বৰকুছিৰ ৰাজু দাস নামৰ এজন লোকৰ মৰণোত্তৰ পৰীক্ষা৷ এই ৰাজু দাসৰ মৃতদেহ বুলিয়েই তেওঁৰ ভতিজাক জগদীশ দাসে নির্মল দাসৰ মৃত শৰীৰ এম্বুলেঞ্চত উঠাই নলবাৰীলৈ যাত্রা কৰে৷ অৱশ্যে চিকিৎসালয় কর্তৃপক্ষই লগে লগে জগদীশ দাসক ফোনযোগে যোগাযোগ কৰি মৃতদেহ ঘূৰাই আনিবলৈ নির্দেশ দিয়ে৷ আদাবাৰী পাৰ হৈ যোৱা জগদীশ দাসে তেতিয়াহে নিজৰ ভুল ধৰিব পাৰে৷ খুৰাকৰ মৃতদেহ বুলি আনৰ মৃতদেহ লৈ যোৱাৰ ভুল ধৰিব পাৰি খৰধৰকৈ মৃতদেহ লৈ জিএমচিএইচৰ মৰণোত্তৰ গৃহত উপস্থিত হয়৷ ইফালে সমগ্র ঘটনাক লৈ জিএমচিএইচ কর্তৃপক্ষই ভঙাগড় থানাত এক অভিযোগ দাখিল কৰে৷ উক্ত অভিযোগৰ ভিত্তিত আৰক্ষীয়ে জগদীশ দাসক আটক কৰি সোধা–পোছা অব্যাহত ৰাখিছে৷ অৱশ্যে নির্মল দাসৰ পৰিয়ালে এই সন্দর্ভত আৰক্ষীৰ ওচৰত কোনো অভিযোগ দাখিল কৰা নাই৷ ইফালে ঘটনা সন্দর্ভত জগদীশ দাসে প্রকাশ কৰা অনুসৰি যোৱা দুদিন ধৰি তেওঁ আৰু পৰিয়ালৰ লোকে খুৰাকৰ সৈতে লাগি থকাত টোপনি ক্ষতি হৈ যথেষ্ট ভাগৰি পৰিছিল৷ হঠাৎ খুৰাকৰ মৃত্যু হোৱাত মানসিকভাৱে তেওঁলোক ভাগি পৰা হেতুকে মৰণোত্তৰ পৰীক্ষাৰ পিছত মৃতকৰ মুখ নোচোৱাকৈ তেওঁলোকে লৈ গৈছিল৷ অৱশ্যে পিছত ভুল ধৰিব পাৰে৷