শুৱালকুছি মহাবিদ্যালয়ত স্হাপন কৰা হৈছে ’হেৰিটেজ উইভিং ভিলেজ’
অধ্যয়নৰ লগতে তাঁতশালত কপোৰ উৎপাদন কাৰ্যতো জড়িত কৰিব ছাত্ৰ ছাত্ৰীক
বিশেষ বাৰ্তা, 7 মাৰ্চঃ অসমৰ ৰেশম শিল্পৰ পীঠস্থান শুৱালকুছিত শুৱালকুছি বুদৰাম মাধৱ সত্ৰাধিকাৰ মহাবিদ্যালয়খন অৱস্হিত যদিও আজিকোপতি মহাবিদ্যালয়খনত শিল্পটোক চাক্ষুষ ভাৱে বুজিৱলৈ কোনো ব্যৱস্থা নাছিল৷ কিন্ত শেহতীয়া ভাৱে “শুৱালকুছি তাতঁশিল্প উন্নয়ন সমিতি“ৰ সহযোগিতাত মহাবিদ্যালয়ৰ পুথিভঁৰালত ৰেশম শিল্প অধ্যয়ন আৰু গৱেষণাৰ এক বিশেষ কোষ স্হাপন কৰা হৈছে৷ লগতে আমাৰ পুৰণিকলীয়া শিল্পটোৰ বিভিন্ন কথা জানিবলৈ মহাবিদ্যালয়ত এটা ’হেৰিটেজ উইভিং মিউজিয়াম’ ( Heritage Weaving Museum) স্হাপন কৰা হৈছে৷ ইয়াৰ দ্বাৰা শুৱালকুছিৰ ঐতিহ্যমণ্ডিত বস্ৰশিলটোৰ এটা আভাস পোৱা যাব ৷ শুৱালকুছিৰ নৱ প্ৰজন্মই যাতে শিক্ষাৰ লগতে হস্ততাতঁ বোৱাৰ কথা শিকিব পাৰে তাৰ বাবে মহাবিদ্যালয় প্ৰাংগনত এখন তাতঁশালো স্হাপন কৰি মহাবিদ্যালয়ৰ ফেশ্চন টেকনলজি বিভাগ আৰু এচ ই ই ডি এফ অৰ দ্বাৰা প্ৰশিক্ষণ দিয়াৰ ব্যৱস্থা কৰা হৈছে ৷ উল্লেখ্য যে, এইবাৰ নাক’ৰ পৰিদৰ্শন কাৰী দলক মহাবিদ্যালয়ৰ ছাত্ৰ ছাত্ৰীয়ে বোৱা গামোছাৰেই সম্ভাষণ জনোৱা হৈছে বুলি মহাবিদ্যালয়খনৰ অধ্যক্ষ ড°নিহাৰ ৰঞ্জন কলিতাই এই প্ৰতিবেদকক জানিবলৈ দিছে ৷ মহাবিদ্যালয় কৰ্তৃপক্ষৰ এনে যোগাত্মক চিন্তাই নিশ্চয়কৈ নতুন প্ৰজন্মৰ ছাত্ৰ ছাত্ৰী সকলক শিল্পটোৰ প্ৰতি অধিক আগ্ৰহী কৰি তুলিব বুলি আশা কৰিব পাৰি। এইক্ষেত্ৰত ৰাইজৰ সহযোগ বিচাৰিছে অধ্যক্ষ গৰাকীয়ে৷
প্রেৰক দিলীপ মেধি