নিয়মীয়া বাৰ্তা, ১৮এপ্ৰিলঃ ক’ভিড প্রট’কলৰ মাজেৰে চলিত বর্ষৰ উচ্চতৰ মাধ্যমিক চূড়ান্ত পৰীক্ষা অনুষ্ঠিত কৰিবলৈ সাজু হৈছে অসম উচ্চতৰ মাধ্যমিক শিক্ষা সংসদ৷ এই কথা স্পষ্ট কৰিলে শিক্ষা সংসদৰ সচিব ৰমেশ চন্দ্র চুতীয়াই৷ সংবাদ মাধ্যমৰ আগত সচিবজনে কয়– ১১ মে’ৰ পৰা ১৪ জুনলৈ নির্দিষ্ট দিনতেই অনুষ্ঠিত হ’ব উচ্চতৰ মাধ্যমিকৰ চূড়ান্ত পৰীক্ষা৷ ইতিমধ্যে সংসদে ২০ এপ্রিলৰ পৰা ব্যৱহাৰিক পৰীক্ষাৰ বাবে সকলো প্রস্তুতি সম্পূর্ণ কৰি তুলিছে৷
আনহাতে, ১১ মে’ৰ পৰা হ’ব লগা পৰীক্ষাৰ বাবে এডমিট কার্ড, উত্তৰবহী আদিৰ কাম প্রায় সম্পূর্ণ হোৱাৰ পথত৷ আনহাতে, ক’ভিড সংক্রমণৰ বাবে ৰাজ্যত সৃষ্টি হোৱা পৰিৱেশৰ ক্ষেত্রত ৰাজ্য চৰকাৰে যি ক’ভিড প্রট’কল জাৰি কৰিব, সেই অনুসৰিয়েই নির্দিষ্ট সময়ত পৰীক্ষা অনুষ্ঠিত হ’ব৷ ৮২০টা পৰীক্ষা কেন্দ্রত পৰীক্ষা অনুষ্ঠিত কৰাৰ বাবে সকলো ব্যৱস্থা কৰা হৈছে৷ তদুপৰি ক’ভিড প্রট’কল অনুসৰিয়েই এই পৰীক্ষা অনুষ্ঠিত কৰাৰ বাবে ব্যৱস্থা লোৱা হৈছে৷
এইবাৰ উচ্চতৰ মাধ্যমিকৰ চূড়ান্ত বর্ষত অৱতীর্ণ হ’ব মুঠ ২,৪৯,৩৯৯গৰাকী শিক্ষার্থী৷ ইয়াৰে বিজ্ঞান শাখাত ৪০,৫৮৮গৰাকী, কলা শাখাত ১,৭৫,১৭৫গৰাকী, বাণিজ্য শাখাত ১,০৮,১৭৮গৰাকী আৰু ভ’কেচনেল পৰীক্ষার্থী হ’ব ৮৬৮গৰাকী৷ শিক্ষা সংসদৰ সচিবজনে প্রকাশ কৰা অনুসৰি এইবাৰ পৰীক্ষাত প্রতিগৰাকী শিক্ষার্থীয়ে মাস্ক পিন্ধাটো বাধ্যতামূলক হ’ব৷ তদুপৰি পৰীক্ষা কেন্দ্রত ছেনিটাইজাৰ, উষ্ণতা মাপক যন্ত্র আদি মজুত থাকিব৷