মিঞা নেতাক নিয়ন্ত্রণ নকৰিলে কামাখ্যা–বৰদোৱা–কলাক্ষেত্ৰ নাবাচিব

নিয়মীয়া বাৰ্তা ১২ নৱেম্বৰঃ ‘কা’ আন্দোলনৰ পৰাই শ্রীমন্ত শংকৰদেৱ কলাক্ষেত্র ধ্বংসৰ লক্ষ্য কৰি লৈছে একাংশই৷ শেহতীয়াকৈ মিঞা মিউজিয়ামৰ প্রসংগ উত্থাপন কৰি কলাক্ষেত্রত নীলা লুঙী সংৰক্ষণৰ প্রস্তাৱ দিছে৷ –এই অভিযোগ বিত্ত, স্বাস্থ্যমন্ত্রী ড০ হিমন্ত বিশ্ব শর্মাৰ৷ শেহতীয়াকৈ বদৰুদ্দিন আজমলে কলাক্ষেত্রত সভা অনুষ্ঠিত কৰিব বুলি কৰা মন্তব্যৰ পাছতেই পুনৰ সৰৱ হৈ পৰিছে মন্ত্রী শর্মা৷ বুধবাৰে মন্ত্রীগৰাকীয়ে কয়– অসমৰ ৰাইজে বুজি উঠা উচিত বদৰুদ্দিন আজমল আৰু শ্বেৰমানৰ জৰে মানুহৰ লক্ষ্য কলাক্ষেত্র৷ ‘কা’ আন্দোলনৰ সময়তে কলাক্ষেত্র ভাঙি দিয়াৰ পৰিকল্পনা কৰিছিল৷ কিন্তু আৰক্ষীৰ তৎপৰতাত সেয়া ব্যর্থ হ’ল৷ শ্বেৰমান আলীয়ে মিঞা মিউজিয়ামৰ প্রসংগ উত্থাপন কৰি নীলা লুঙী ৰাখিব বুলি ক’লে৷ তাৰ পাছত ভদ্র ভাষাত আজমলে শিল্পগ্রামৰ পৰা হুংকাৰ দিলে যে কলাক্ষেত্রত সভা কৰিব৷ দৰাচলতে মিঞাসকলৰ মনত শংকৰদেৱ কলাক্ষেত্র সোমাই গৈছে৷ আগতে বৰদোৱা তেওঁলোকৰ মূৰত সোমাই আছিল৷ এইবাৰ শংকৰদেৱ কলাক্ষেত্র মূৰত সোমাইছে৷ এই মিঞা নেতাসকলক যদি আমি নিয়ন্ত্রণ কৰিব নোৱাৰোঁ, তেন্তে কামাখ্যাও নাথাকিব, বৰদোৱা নাথাকিব, শংকৰদেৱ কলাক্ষেত্রও নাথাকিব৷ ইফালে, ড০ শর্মাক বদৰুদ্দিন আজমলে নৰম হৈ থাকিবলৈ দিয়া পৰামর্শ প্রসংগতো আজি মন্ত্রীগৰাকীয়ে কয়– এয়া মোৰ দেশ, মোৰ মাটি, মোৰ পানী৷ ইয়াত মই হাঁহিম–কান্দিম৷ তেওঁলোক য’ৰ পৰা আহিছে, তাত তেওঁলোকে হাঁহিব–কান্দিব৷ ইয়াত মোক পৰামর্শ দিব নালাগে৷ এয়া মোৰ দেশ, মোৰ মাটি, মোৰ জন্মভূমি৷