নিউজ ডেস্ক, ২ এপ্রিলঃ নক্সালমুক্ত হোৱাৰ দিশে ভাৰত৷ কেন্দ্রীয় চৰকাৰৰ কঠোৰ অভিযানৰ বাবে মাওবাদৰ প্রভাৱ ১২খন জিলাৰ পৰা ৬খন জিলালৈ হ্রাস পাইছে৷ কেন্দ্রীয় গৃহমন্ত্রী অমিত শ্বাহে আজি এই তথ্য দাঙি ধৰিছে৷ ২০২৬ চনৰ ৩১ মার্চত ভাৰতত মাওবাদীৰ অন্তিম দিন হ’ব বুলি ইতিমধ্যে কেইবাবাৰো ঘোষণা কৰা কেন্দ্রীয় গৃহমন্ত্রীয়ে কয় যে এক দশক ধৰি মাওবাদী নির্মূল কৰাৰ বাবে কেন্দ্রই ধাৰাবাহিক অভিযান চলাই আছে৷ ভাৰতক নক্সালমুক্ত কৰাৰ কঠোৰ পদক্ষেপ গ্রহণ কৰিছে কেন্দ্রই৷ প্রধানমন্ত্রী নৰেন্দ্র মোদী চৰকাৰে অহা বর্ষৰ ৩১ মার্চৰ ভিতৰত দেশৰ পৰাই মাওবাদীক উৎখাত কৰিব৷ কেন্দ্রৰ কঠোৰ পদক্ষেপৰ বাবে মাওবাদীৰ উপদ্রৱ থকা ১২খন জিলাৰ ভিতৰত এতিয়া ৬খন জিলাতহে মাওবাদীৰ প্রভাৱ সামান্য পৰিমাণে আছে৷ অর্থাৎ ৬খন জিলাত মাওবাদীৰ উপদ্রৱ নোহোৱা হৈছে৷ সামাজিক মাধ্যমত কেন্দ্রীয় গৃহমন্ত্রীয়ে কয়– নক্সালমুক্ত ভাৰত গঢ়াৰ তেওঁলোকৰ প্রতিশ্রুতি ইতিমধ্যে সম্পূর্ণ হোৱাৰ দিশে আগবাঢ়িছে৷ নক্সালবাদীৰ বিৰুদ্ধে কঠোৰ পদক্ষেপ গ্রহণ কৰাৰ সমান্তৰালকৈ এক শক্তিশালী সুৰক্ষিত আৰু সমৃদ্ধ ভাৰত গঢ়াৰ নিৰলস প্রচেষ্টা চলাই থকাৰ বাবে কার্যসূচী ৰূপায়ণ কৰা হৈছে৷ উল্লেখ্য যে ২০২৪ চনত নিৰাপত্তা বাহিনীৰ সৈতে সংঘর্ষত ২০৭জন মাওবাদী নিহত হৈছে৷ বিগত জানুৱাৰী মাহত সংসদৰ শীতকালীন অধিৱেশনত কেন্দ্রীয় ৰাজ্যিক গৃহমন্ত্রী নিত্যানন্দ ৰায়ে এক প্রশ্ণৰ উত্তৰত কৈছিল যে ২০১০ চনত ১০খন ৰাজ্যৰ ১২২খন জিলাত মাওবাদীৰ উপদ্রৱ আছিল৷ বিগত ২০২৩ বর্ষত এই মাওবাদীৰ উপদ্রৱ থকা জিলা ৩৮লৈ হ্রাস পাইছিল৷ কেন্দ্রীয় গৃহমন্ত্রী শ্বাহৰ তথ্যত দেশত মাত্র ৬খন জিলাতহে মাওবাদীৰ উপদ্রৱ আছে বুলি মন্তব্য কৰিছে৷