বিশেষ বাৰ্তা, ৫ ছেপ্টেম্বৰঃ এছিয়া কাপৰ ছুপাৰ-৪ পৰ্যায়ৰ বাবে যোগ্যতা অৰ্জন কৰিছে ভাৰতীয় দলটোৱে। গ্ৰুপ পৰ্যায়ত ভাৰতে নেপালক ১০ উইকেটত পৰাস্ত কৰি অগ্ৰগতি লাভ কৰে। ভাৰতৰ বিৰুদ্ধে নেপালৰ পৰা অতি ভাল প্ৰদৰ্শন দেখা গ’ল। প্ৰথমে বেটিং কৰি নেপাল দলে ৪৮.২ অভাৰত ২৩০ ৰান সংগ্ৰহ কৰি অল আউট হয়। দলটোৰ এই প্ৰদৰ্শনৰ পিছত ভাৰতীয় খেলুৱৈসকলে নেপালৰ খেলুৱৈসকলক প্ৰশংসা কৰে। ভাৰতীয় খেলুৱৈসকলে ড্ৰেছিং ৰুমত মেডেল পিন্ধাই নেপালী খেলুৱৈসকলক শলাগ লয়, যাৰ ভিডিঅ’টো ছ’চিয়েল মিডিয়াত অতি দ্ৰুতগতিত ভাইৰেল হৈ আছে। ভিডিঅ’টোত দেখা যায় যে ভাৰতৰ উপ-অধিনায়ক হাৰ্দিক পাণ্ডিয়াই প্ৰথমে নেপালী খেলুৱৈক পদক প্ৰদান কৰিছিল। ইয়াৰ পিছত দলৰ প্ৰাক্তন অধিনায়ক বিৰাট কোহলীয়েও নেপালী খেলুৱৈসকলক পদক প্ৰদান কৰে। তাৰ পাছত ভাৰতীয় মুখ্য প্ৰশিক্ষক ৰাহুল দ্ৰাবিড়ে নেপালী খেলুৱৈসকলক উৎসাহিত কৰি পদক প্ৰদান কৰে। ভাৰতৰ বিৰুদ্ধে নেপালে উৎকৃষ্ট বেটিং প্ৰদৰ্শন দেখুৱাইছিল। মেচখনত প্ৰথমে বেটিং কৰি ৪৮.২ অভাৰত ১০টা উইকেট হেৰুৱাই ব’ৰ্ডত ২৩০ ৰান সংগ্ৰহ কৰে। দলৰ হৈ অ’পেন কৰিবলৈ অহা আছিফ শ্বেখে ৮ চাৰিৰ সহায়ত ৫৮ ৰানৰ ইনিংছ খেলিছিল। ইয়াৰ উপৰি ৮ নম্বৰত বেটিং কৰাৰ সময়ত সোমপাল কামিয়ে এটা চাৰি আৰু ৩ ছয়ৰ সহায়ত ৪৮ ৰান সংগ্ৰহ কৰে। প্ৰথম ইনিংছৰ পিছত বৰষুণে খেলখন ব্যাহত কৰি তাৰ পিছত ডাকৱৰ্থ লুইছৰ জৰিয়তে ভাৰতক ২৩ অভাৰত ১৪৫ ৰানৰ লক্ষ্য দিয়া হৈছিল, যিটো দলটোৱে কোনো উইকেট নেহেৰুৱাই ২০.১ অভাৰত অৰ্জন কৰিছিল। দলটোৰ হৈ অধিনায়ক ৰোহিত শৰ্মাই ৫৯ বলত ৭৪ আৰু শুভমান গিলে ৬২ বলত ৬৭ ৰানৰ ইনিংছ খেলিছিল। ৰোহিত শৰ্মাৰ ইনিংছত ৬টা চাৰি আৰু ৫টা ছয় আৰু গিলৰ ইনিংছত ৮টা চাৰি আৰু ১টা ছয়।