নিয়মীয়া বাৰ্তা ডিজিটেল, ২৪ ফেব্ৰুৱাৰীঃ চাহ জনগোষ্ঠীৰ চহকী সাংস্কৃতিক পৰম্পৰা বিশ্ব দৰবাৰত জনপ্রিয়কৰণৰ বাবে আজি গুৱাহাটীৰ সৰুসজাই ক্রীড়া প্রকল্পত অনুষ্ঠিত হ’ব ‘ঝুমইৰ বিনন্দিনী’ অনুষ্ঠান৷ দেশৰ প্রধানমন্ত্রী নৰেন্দ্র মোদীৰ উপস্থিতিত সন্ধিয়া ৫.৩০ বজাৰ পৰা এই অনুষ্ঠান আৰম্ভ হ’ব৷ মুখ্যমন্ত্রী ড০ হিমন্ত বিশ্ব শর্মাই এই কথা প্রকাশ কৰি কয় যে যিসকল দর্শকে ইতিমধ্যে উক্ত অনুষ্ঠান চোৱাৰ বাবে প্রৱেশ–পত্র লৈছে তেওঁলোকে আজি বিয়লি ৩.৩০ বজাৰ ভিতৰত ষ্টেডিয়ামত প্রৱেশ কৰিব লাগিব৷ কাৰণ প্রধানমন্ত্রী অহাৰ পৰিপ্রেক্ষিতত নিৰাপত্তাৰক্ষীৰ তালাচী আদিৰ বাবে কিছু সময় লাগিব৷ মুখ্যমন্ত্রী ড০ শর্মাই কয় যে প্রধানমন্ত্রী মোদী ষ্টেডিয়ামত উপস্থিত হৈয়েই এখন বিশেষ বাহনেৰে ষ্টেডিয়ামখনৰ চাৰিওফালে ঘূৰি উক্ত অনুষ্ঠানত অংশগ্রহণ কৰা শিল্পীসকলক মাত দিয়াৰ লগতে দর্শককো অভিবাদন জনাব৷ তাৰ পাছতে মুখ্যমন্ত্রী ড০ শর্মাই ৫ মিনিটৰ এক চমু ভাষণ দিব৷ ইয়াৰ পাছতে প্রধানমন্ত্রী মোদীয়ে ভাষণ দিব আৰু প্রধানমন্ত্রীৰ ভাষণ শেষ হোৱাৰ লগে লগে নৃত্য পৰিৱেশন কৰা হ’ব৷ ঝুমুৰ নৃত্য শেষ হোৱাৰ পাছত এক লেজাৰ শ্ব’ প্রদর্শন কৰা হ’ব৷ য’ত বিশেষ সাংস্কৃতিক থীম থাকিব৷ মুখ্যমন্ত্রী ড০ শর্মাই আৰু কয় যে আজিৰ ‘ঝুমইৰ বিনন্দিনী’ অনুষ্ঠানত বৈদেশিক পৰিক্রমা মন্ত্রী ড০ এছ জয়শংকৰৰ নেতৃত্বত অহা ৬১ ৰাষ্ট্রদূতেও অংশগ্রহণ কৰিব৷ ইয়াৰে ২২গৰাকী ৰাষ্ট্রদূত পৰিয়ালৰ সৈতে আহিব৷ ইতিমধ্যে তেওঁলোক যোৰহাটত উপস্থিত হৈ ৰয়েল ডি কাছা আৰু বৰগছ ৰিজ’টত নিশাটো কটায়৷ মুখ্যমন্ত্রী ড০ শর্মাই কয় যে ‘ঝুমইৰ বিনন্দিনী’ অনুষ্ঠান ৩৫০জন অতিথিয়ে উপভোগ কৰিব৷ সেইদৰে কাইলৈ ‘ঝুমইৰ বিনন্দিনী’ অনুষ্ঠান ৮০০খন চাহ বাগিচাত প্রদর্শনৰো ব্যৱস্থা কৰা হৈছে৷ টিভি, এলইডি, প্রজেক্টৰৰ জৰিয়তে এই অনুষ্ঠান সম্প্রচাৰ কৰা হ’ব৷ আনহাতে সামাজিক মাধ্যমত একাংশ লোকে ঝুমুৰ ঝাৰখণ্ডৰ বুলি কৈ অহাৰ সম্পর্কত মুখ্যমন্ত্রী ড০ শর্মাই কয় যে ঝুমুৰ এশ শতাংশ অসমীয়া সংস্কৃতি৷ ঝুমুৰৰ লগত ভাৰতবর্ষৰ কোনো ৰাজ্যৰ নৃত্যৰ মিল নাই৷ ঝুমুৰ গীতত তেওঁলোকে ঝাৰখণ্ডত মাক–বাপেকক এৰি অহাৰ বেদনা প্রকাশিত হৈ আছে৷ সেয়ে ঝুমুৰ এশ শতাংশ অসমীয়া সংস্কৃতি৷ আজিৰ ‘ঝুমইৰ বিনন্দিনী’ কার্যসূচীলৈ সকলো বিধায়ককে আমন্ত্রণ কৰা হৈছে বুলিও মুখ্যমন্ত্রী ড০ শর্মাই প্রকাশ কৰে৷