বিশেষ বাৰ্তা, ১৮ অক্টোবৰঃ জয়পুৰ কৃষি মহকুমা কাৰ্যালয়ৰ উদ্যোগত আজি কৃষি বিভাগৰ বিভিন্ন আঁচনিৰ সন্দৰ্ভত সজাগতা সভা আৰু কাতি বিহু উদযাপন কৰা হয়। নাহৰকটীয়া সমষ্টিৰ বিধায়ক তৰংগ গগৈৰ উপস্থিতিত আয়োজন কৰা এই সভাখনত কৃষক সকলক অসম চৰকাৰৰ তৰফৰ পৰা ৰূপায়ন কৰা আঁচনিসমূহৰ সম্পৰ্কত বক্তব্য দাঙি ধৰে বিধায়কগৰাকীয়ে । নাহৰকটীয়া বৰবাম গাওঁ পঞ্চায়ত অন্তৰ্গত ১ নং বৰবাম গাওঁত অনুষ্ঠিত এই সভা খনত কৃষি বিভাগৰ তৰফৰ স্থানীয় ছয় গৰাকী প্ৰগতিশীল কৃষকক এখনি ফুলাম গামোচা, সম্বৰ্ধনা পত্ৰ আৰু এটা স্প্ৰেয়াৰ মেছিন সহ সম্বৰ্ধিত কৰা হয় । ইয়াৰ উপৰিও স্থানীয় চাৰি গৰাকী আগ্ৰহী কৃষকক এখনি মানপত্ৰ আৰু এটা গোমধানৰ টোপোলাৰ জৰিয়তে উৎসাহিত কৰা হয়।উল্লেখযোগ্য যে কাতি বিহুৰ দিনা সেউজীয়া ধাননি ডৰাত শস্য নষ্টকাৰী কীট-পতংগৰ বোৰৰ পৰা যাতে সুকলমে ৰাখিব পাৰি সেই উদ্দেশ্যেৰে পূৰ্বৰ লোকাচাৰ অনুসৰি বৰবাম পথাৰত এগছি বন্তি জ্বলাই প্ৰাৰ্থনা জনায় বিধায়ক তৰংগ গগৈয়ে।এই সজাগতা সভা খনত নাহৰকটীয়াৰ ৰাজহ চক্ৰ বিষয়া শৰৎ গগৈ, বিজেপি নাহৰকটীয়া মণ্ডলৰ সভাপতি গকুল বড়া, সম্পাদক হিৰণ্য মন্ত্ৰী, ঠেঙাল কছাৰী স্বায়ত্ত পৰিষদৰ সদস্য মনদ্বীপ বড়া,বৰবাম পঞ্চায়তৰ সভাপতি তুখেশ্বৰ গগৈ, নাহৰকটীয়া মহকুমা কৃষি উন্নয়ন বিষয়া জ্যোতিময় ফুকন, জেষ্ঠ কৃষি উন্নয়ন বিষয়া গণেশ পশুচুঙী,জয়পুৰ আঞ্চলিক পঞ্চায়তৰ সদস্য ৰাণী শইকীয়া, দীঘলীয়া পঞ্চায়তৰ সভাপতি পৰাণু গগৈকে প্ৰমুখ্য কৰি স্থানীয় লোক সকল উপস্থিত থাকে ।
প্ৰেৰক প্ৰাঞ্জল ভূঞা