নেপালত ৰূপৰ পদকেৰে জিলিকিল জামুগুৰিহাটৰ বাৰ্বী বৰুৱা, আন্তঃৰাষ্ট্ৰীয় টাইকোৱাণ্ডো চেম্পিয়ন চিপত দেশৰ হৈ প্ৰতিনিধিত্ব

নিয়মীয়া বাৰ্তা, ইটাখোলা, ১১ এপ্ৰিলঃ থাৰ্ড ইমান ইন্টাৰনেচনেল অপেন টাইকোৱাণ্ডো চেম্পিয়নশ্বিপত ৰূপৰ পদকৰে গৌৰৱ কঢ়িয়াই আনিছে জামুগুৰিহাটৰ শিশু খেলুৱৈ বাৰ্বী বৰুৱাই৷ নেপালৰ কাঠমাণ্ডুত ৮ আৰু ৯ এপ্ৰিলত অনুষ্ঠিত এই আন্তঃৰাষ্ট্ৰীয় টাইকোৱাণ্ডো প্ৰতিযোগিতাত ভাৰতৰ হৈ প্ৰতিনিধিত্ব কৰা বাৰ্বী বৰুৱাই ৩০ কেজিৰ শাখাত অৱতীৰ্ণ হৈ কেইবাখনো দেশৰ খেলুৱৈক ধৰাশায়ী কৰে যদিও দ্বিতীয় স্থানৰে দেশৰ গৌৰৱ কঢ়িয়াবলৈ সক্ষম হয়৷ আন্তঃৰাষ্ট্ৰীয় খেলত ৰূপৰ পদকৰে দেশৰ লগতে জামুগুৰিহাটলৈ গৌৰৱ কঢ়িয়াই অনা বাবে বাৰ্বী বৰুৱাক  জামুগুৰিহাটৰ বিভিন্ন অনুষ্ঠান-প্ৰতিষ্ঠান, ব্যক্তি বিশেষে আন্তৰিক শুভেচ্ছা জ্ঞাপন কৰিছে ৷ হলী চাইল্ড ইংলিছ স্কুলৰ পঞ্চম মানত অধ্যয়নৰত বাৰ্বী বৰুৱা জামুগুৰিহাট নিবাসী  হোমিও চিকিৎসক দাদুল বৰুৱা আৰু জুৰি শৰ্মা বৰুৱাৰ কনিষ্ঠ কন্যা৷ ইতিমধ্যে বাৰ্বী বৰুৱাই ৰাজ্যিকভিত্তিত অনুষ্ঠিত কেইবাখনো প্ৰতিযোগিতাত গোল্ড মেডেল লাভ কৰিবলৈ সক্ষম হৈছিল৷