নিয়মীয়া বাৰ্তা,৯ জুনঃ আৰক্ষীয়ে কালি নিশা এক অভিযান চলাই কুকুৰমাৰাৰ পৰা চুৰি গাড়ী ক্ৰয় কৰাৰ অপৰাধত দুজন লোকক আটক কৰে ৷ আটকাধীন লোক দুজন হ’ল পলাশবাৰী সমষ্টিৰ বৰতেজপুৰ গাঁৱৰ হিমাংশু কলিতা আৰু দুই নং আমত’লা গাঁৱৰ ফুকন কলিতা ৷ জানিব পৰামতে যোৱা ২০১৯ চনৰ ২৮ ফেব্ৰুৱাৰীত গুৱাহাটীৰ আমিনগাঁৱৰ পৰা এখন পালচাৰ ২২০ গাড়ী চুৰি হৈছিল ৷ ইতিমধ্যে কামৰূপ আৰক্ষীৰ হাতত পৰা এজাহাৰৰ ভিত্তিত আৰক্ষীয়ে তদন্ত অব্যাহত ৰাখিছে ৷ তাৰেই ফলশ্ৰুতিত যোৱা নিশা ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত চলোৱা অভিযানত চুৰি হোৱা বাইক সহ দুজন লোকক আটক কৰে ৷ জানিব পৰামতে উক্ত বাইকখন ছিপাঝাৰৰ এজন লোকৰ আছিল ৷ উক্ত বাইকখন কোনে চোৰ কৰিছিল এতিয়ালৈকে জানিব পৰা হোৱা নাই যদিও চোৰৰ পৰাই আটকাধীন লোক দুজনে বাইকখন ক্ৰয় কৰা বুলি আৰক্ষীয়ে জানিবলৈ দিয়ে ৷