নিময়ীয়া বাৰ্তা, ১১ জুনঃ বছৰ বছৰ ধৰি মাৰ্ঘেৰিটা নগৰ সমিতিক কৰ পৰিশোধ নকৰাৰ লগতে দীৰ্ঘদিন ধৰি ঠিকা ভিত্তিক শ্ৰমিক কৰ্মচাৰীক ভাউচাৰ পেমেণ্টৰ দ্বাৰা শোষণ অব্যাহত ৰাখি বিতৰ্কৰ মাজত সোমাই পৰা মাৰ্ঘেৰিটা নগৰৰ মাজ মজিয়াত অৱস্থিত চেগুনবাৰী চাহ ফেক্টৰিত তিনিচুকীয়া জিলা শ্ৰম বিভাগ, মাৰ্ঘেৰিটা মহকুমা প্ৰশাসন তথা মাৰ্ঘেৰিটা আৰক্ষীয়ে শিশু শ্ৰমিকৰ বিৰুদ্ধে নিশা অভিযান চলায়। চেগুনবাৰী চাহ ফেক্টৰীত বিশেষকৈ নিশা শিশু শ্ৰমিকক ব্যৱহাৰৰ কৰি অহাৰ এক অভিযোগ লাভ কৰাত শ্ৰম বিভাগে এই অভিযান চলায় যদিও অভিযান কালত শিশু শ্ৰমিক পোৱা নগল। অন্যহাতে চাহ ফেক্টৰীটোৱে সুদীৰ্ঘ বছৰে শ্ৰমিক কৰ্মচাৰীক ভাউচাৰ পেমেণ্টত দৰমহা দি শ্ৰম আইন উলংঘা কৰি অহাৰ লগতে আন বহুকেইটা অভিযোগ আছে চাহ ফেক্টৰিটোৰ বিৰুদ্ধে। তিনিচুকীয়া জিলা শ্ৰম বিভাগে উক্ত চাহ ফেক্টৰীৰ প্ৰায় ভাগ অভিযোগ সন্দৰ্ভত জ্ঞাত য’দিও ৰহস্যজনক কাৰণত সকলো অনিয়ম দেখাৰ পিছতো চকুমুদা কুলিৰ ভাও দিয়াৰ গুৰুতৰ অভিযোগ উত্থাপন হৈছে। একাংশ শ্ৰমিক তথা বছৰ বছৰ ধৰি এখন মাত্ৰ ভাউচাৰত দৰমহা আদায় লোৱা কৰ্মচাৰীসকল ক্ষুব্ধ হৈ পৰা পৰিলক্ষিত হৈছে। শ্ৰমিক সংগঠনৰ তৰফৰ পৰাও বিভিন্ন অনিয়ম সন্দৰ্ভত জিলা শ্ৰম বিভাগক বাৰম্বাৰ অভিযোগ প্ৰদান কৰাৰ পিছতো শ্ৰম বিষয়াই বিষয়টোত গা এৰা মনোভাৱ দিয়াৰ অভিযোগ উত্থাপিত হৈ আহিছে। সানান্য কেইজন মান স্থায়ী কৰ্মচাৰীৰ বাদে আন নব্বৈ শতাংশ শ্ৰমিক কৰ্মচাৰীৰ উক্ত চাহ বাগিচাখনত কোনো ভৱিষ্যতনিধিৰ ব্যৱস্থা নাই য’দিও জিলা শ্ৰম বিভাগ কিন্তু গোপন অংকৰ বুজা বুজিৰ বাবেই উক্ত বিষয়ত সম্পূৰ্ণ মৌণ। নিশা অভিযান কাৰী দলটোৱে চেগুনবাৰী চাহ ফেক্টৰিক প্ৰয়োজনীয় নথি পত্ৰ সমূহ শীঘ্ৰে থিক থাক কৰি ল’বৰ বাবে নিৰ্দেশ দিয়ে য’দিও সেই নিৰ্দেশক মইমতালিৰে পৰিচালিত হোৱা চেগুণবাৰী ফেক্টৰী কতৃপক্ষই অংগুষ্ঠ পদৰ্শন কৰিব বুলিহে একাংশ শ্ৰমিকে মত প্ৰকাশ কৰিছে। সমগ্ৰ বিষয়টোৱে অঞ্চলটোত প্ৰতিক্ৰিয়া সৃষ্টি হৈছে।
প্ৰেৰক মানসপ্ৰতিম গগৈ