বিশেষ বাৰ্তা, ২৩ ফেব্ৰুৱাৰীঃ অসমৰ ক্ৰীড়া জগতৰ বাবে অতি দুখবৰ! অসম দলৰ প্ৰশিক্ষক হিচাপে যোৱা টাইকোৱানডো খেলৰ প্ৰশিক্ষক তথা অসমৰ এগৰাকী সুদক্ষ টাইকোৱানডো খেলুৱৈৰ বহি:ৰাজ্যত শোকাবহ মৃত্যুৱে ৰাজ্যখনত গভীৰ শোকৰ ছাঁ পেলাইছে।অসম দলৰ প্ৰশিক্ষক হিচাপে যোৱা ডিব্ৰুগড়ৰ টাইকোৱানডো খেলুৱৈ দিগন্ত বৰাৰ হায়দৰাবাদত সংঘটিত এক আকস্মিক পথ দুৰ্ঘটনাত মৃত্যু হোৱা ঘটনাই শোকস্তব্ধ কৰি তুলিছে ক্ৰীড়া প্ৰেমিক। ডিব্ৰুগড় মানকটা ৰূপ নগৰৰ নিবাসী দিগন্ত বৰা অসম দলৰ হৈ টাইকোৱানডো দলটোৰ প্ৰশিক্ষক হিচাপে গৈছিল।যোৱা বুধবাৰে হায়দৰাবাদ পোৱাৰ পাছত নিশা প্ৰায় ১১ বজাত পথত এখন যাত্ৰীবাহী বাছে দিগন্ত বৰাক মহতীয়াই নিয়ে।ফলত মূৰত প্ৰচণ্ড আঘাত পোৱা সুদক্ষ খেলুৱৈগৰাকীক চিকিৎসালয়লৈ নিয়া হয় যদিও চিকিৎসকে মৃত্যু বুলি ঘোষণা কৰে।সুদক্ষ টাইকোৱানডো খেলুৱৈ তথা অসম দলৰ প্ৰশিক্ষক হিচাপে যোৱা দিগন্ত বৰা “ৰাষ্ট্ৰীয় কেডেট টাইকোৱানডো চেম্পিয়নশ্বিপ প্ৰতিযোগিতা”ৰ অসম দলৰ প্ৰশিক্ষক হিচাপে ৰাজ্যিক দলৰ সৈতে গৈ দূৰ্ঘটনাত মৃত্যু হোৱা ঘটনাৰ খবৰ বিয়পি পৰাৰ লগে লগে তেওঁৰ বাসগৃহত গভীৰ শোকৰ ছাঁ পৰিছে।বহি:ৰাজ্যলৈ নিজ ৰাজ্যক প্ৰতিনিধিত্ব কৰি অংশগ্ৰহণ কৰিবলৈ গৈ আকস্মিক দুৰ্ঘটনাত সুদক্ষ টাইকোৱানডো খেলুৱৈ গৰাকীৰ মৃত্যুৰ পাছতে শোকস্তব্ধ কৰি তুলিছে। তেওঁৰ মৃতদেহ, মৰণোত্তৰ পৰীক্ষা পাছত শুক্ৰবাৰে তেওঁৰ নিজ বাসগৃহত পাবহি বুলি জানিব পৰা গৈছে।
প্ৰেৰক বিভাস দুৱৰা