🔹 গুৱাহাটীৰ ৰাজীৱ ভৱনত ৰকিবুল হুছেইনৰ বিৰুদ্ধে ব্যাপক পোষ্টাৰিং
বিশেষ বাৰ্তা, ২১ জানুৱাৰী : হাতত পদুম ফুল লৈ গুৱাহাটীৰ ৰাজীৱ ভৱনত ৰকিবুল হুছেইন ! ৰাহুল গান্ধীৰ ন্যায় যাত্ৰাৰ মাজতে কংগ্ৰেছত আভ্যন্তৰীণ কন্দলে গা কৰি উঠিছে! আভ্যন্তৰীণ কন্দলত জৰ্জৰিত হৈ পৰিছে কংগ্ৰেছ দলটো। এইবাৰ কংগ্ৰেছৰ জ্যেষ্ঠ নেতা ৰকিবুল হুছেইনৰ বিৰুদ্ধে ব্যাপক পোষ্টাৰিং গুৱাহাটীৰ ৰাজীৱ ভৱনত। পোষ্টাৰত ৰকিবুল হুছেইনক হাতত পদুম ফুল লৈ থকা দেখা গৈছে। উল্লেখ্য যে অসম কংগ্ৰেছক ২০২১ চনৰ বিধানসভা নিৰ্বাচনত ৰকিবুল হুছেইনে বিজেপিক বিক্ৰী কৰা বুলি পোষ্টাৰত উল্লেখ কৰি অসম কংগ্ৰেছৰ কৰ্মীসকলক ন্য়ায় প্ৰদানৰ বাবে অনুৰোধ কৰা দেখা গৈছে। তদুপৰি ৰকিবুল হুছেইন বিজেপিৰ এজেণ্ট নেকি বুলিও পোষ্টাৰত উল্লেখ কৰা হৈছে। অজ্ঞাত লোকে কংগ্ৰেছৰ জ্যেষ্ঠ নেতাজনৰ বিৰুদ্ধে কৰা এই পোষ্টাৰিঙে বিশেষ তাৎপৰ্য বহন কৰিছে। লগতে ৰকিবুল হটাও কংগ্ৰেছ বচাও বুলিও উল্লেখ আছে পোষ্টাৰত। ৰাহুল গান্ধীৰ ন্যায় যাত্ৰাৰ মাজতে কংগ্ৰেছত চলা এই অথন্তৰে বিপাঙত পেলাইছে কংগ্ৰেছী মহলক।