নিয়মীয়া বাৰ্তা, ২৪ নৱেম্বৰ : কামৰূপৰ মন্দিৰা আৰক্ষীয়ে শনিবাৰে সন্ধিয়া এক অভিযান চলাই মন্দিৰা পালপাৰা গাঁৱৰ ধীৰেন দাস নামৰ এজন লোকক প্ৰায় ১০ কিঃগ্ৰাঃ গাঞ্জাসহ আটক কৰিবলৈ সক্ষম হয় | জানিব পৰা মতে, দীৰ্ঘদিনৰে পৰা লোকজনে নিজৰ চোতালৰ এচুকত ভালেসংখ্যক ভাঙৰ গছ ৰুইছিল। সম্প্ৰতি গছবোৰ পূৰঠ আৰু ডাঙৰ হোৱাত ধীৰেন দাসে তাৰ পৰাই অঞ্চলটোত নিতৌ গাঞ্জা বিক্ৰী কৰাৰ উপৰি ঘৰতো বুজন পৰিমাণৰ গাঞ্জা মজুত ৰাখিছিল | গোপন খবৰৰ ভিত্তিত বকো থানাৰ অ’চি ফণীন্দ্ৰ নাথ আৰু মন্দিৰা আৰক্ষী চকীৰ ভাৰপ্ৰাপ্ত আৰক্ষী বিষয়া বিজয় গোস্বামীৰ নেতৃত্বত যোৱা এদল আৰক্ষীয়ে গাঞ্জা কিনিবলৈ যোৱাৰ ভাও লৈ প্ৰায় দহ কিঃগ্ৰাঃ গাঞ্জা জব্দ কৰাৰ উপৰি ধীৰেন দাসক হাতে-লোটে আটক কৰি জিম্মাত লয় আৰু আজি পুৱা ন্যায়িক জিম্মালৈ প্ৰেৰণৰ দিহা কৰে |
প্ৰেৰক সঞ্জীৱ কুমাৰ দাস