🔹 নতুন সদস্যক আদৰণি সভাপতি ভৱেশ কলিতা-ৰঞ্জিত ভট্টাচাৰ্যৰ
🔹 তৃতীয়বাৰৰ বাবে প্ৰধানমন্ত্ৰীৰ আসনত অধিষ্ঠিত হ’ব মোদী : ৰঞ্জিত ভট্টাচাৰ্য
বিশেষ বাৰ্তা, ১৯ ডিচেম্বৰ : কালি গুৱাহাটী মহানগৰ জিলাৰ অন্তৰ্গত বিজেপি বিমানকোঠ মণ্ডলৰ উদ্যোগত আজাৰা সভাগৃহত অনুষ্ঠিত হয় বিজেপিৰ বিশেষ যোগদান কাৰ্যসূচী। অঞ্চলটোৰ ৪ শতাধিক যুৱক-যুৱতী, পুৰুষ-মহিলাই ভাৰতীয় জনতা পাৰ্টীত আনুষ্ঠানিকভাৱে যোগদান কৰে। ভাৰতীয় জনতা পাৰ্টীৰ নীতি-আদৰ্শৰ প্ৰতি আকৃষ্ট হৈ ৪ শতাধিক লোকৰ বিজেপিত যোগদানে বিশেষ ইংগিত বহন কৰিছে। সমষ্টি পুনৰ নিৰ্ধাৰণৰ চূড়ান্ত তালিকাত প্ৰকাশ পোৱা সম্প্ৰসাৰিত জালুকবাৰী সমষ্টিৰ অন্তৰ্গত আজাৰ অঞ্চলত ভাৰতীয় জনতা পাৰ্টীৰ সাংঠনিক ভেটি আৰু অধিক শক্তিশালী হ’ল। ২০২৪ৰ লোকসভা নিৰ্বাচনৰ পূৰ্বেই অসমত ভাৰতীয় জনতা পাৰ্টীয়ে ব্যাপক হাৰত নিৰ্বাচনী প্ৰস্তুতি চলাইছে। ঠায়ে ঠায়ে যোগদান কাৰ্যসূচীৰ জৰিয়তে দলৰ ভেটি শক্তিশালী কৰাৰ বাবে প্ৰচেষ্টা অব্যাহত ৰাখিছে দলৰ কার্যকর্তাসকলে। এই সভাতে ৰাজ্যিক বিজেপিৰ সভাপতি ভৱেশ কলিতাই কয়- প্ৰধানমন্ত্ৰী মোদী ডাঙৰীয়াৰ বলিষ্ঠ নেতৃত্বৰ প্ৰতি আস্থা-বিশ্বাস অটুট আছে দেশবাসীৰ। আনহাতে, ভাৰতীয় জনতা পাৰ্টী কৃষক মৰ্চাৰ সাধাৰণ সম্পাদক ৰঞ্জিত ভট্টাচাৰ্যই কয়- দেশবাসীৰ মৰম, আস্থা-বিশ্বাস শিৰত লৈ তৃতীয়বাৰৰ বাবে দেশৰ প্ৰধানমন্ত্ৰীৰ আসনত অধিষ্ঠিত হ’ব নৰেন্দ্ৰ মোদী ডাঙৰীয়া। অসমতো মুখ্যমন্ত্ৰী ড৹ হিমন্ত বিশ্ব শৰ্মা ডাঙৰীয়াৰ বলিষ্ঠ নেতৃত্বত অসম দেশৰ ৫খন শীৰ্ষ ৰাজ্যৰ ভিতৰত এখন হ’ব বুলি আমি আশাবাদী। এই যোগদানে ভাৰতীয় জনতা পাৰ্টীৰ ভেটি আৰু অধিক শক্তিশালী কৰিব বুলি আশা ৰঞ্জিত ভট্টাচাৰ্যৰ। এই অনুষ্ঠানত ভাৰতীয় জনতা পাৰ্টীৰ ৰাজ্যিক সভাপতি ভৱেশ কলিতা, গুৱাহাটী মহানগৰ জিলা সভাপতি তপন দাস, বিজেপিৰ বিমানকোঠ মণ্ডলৰ সভাপতি হৰকান্ত নাথ, গুৱাহাটী মহানগৰ জিলা সাধাৰণ সম্পাদক বিজয় পাঠক, জালুকবাৰী সমষ্টিৰ বিস্তাৰক জয়ন্ত হালৈ প্ৰমুখ্যে বহু কাৰ্যকর্তা উপস্থিত থাকে।