নিয়মীয়া বার্তা, ১৫ জুনঃ দেশৰ আগশাৰীৰ ফুটবল প্রতিযোগিতা ইণ্ডিয়ান ছুপাৰ লীগত আন এগৰাকী অসম সন্তানে খেলিবলৈ সুযোগ লাভ কৰিছে৷
ৰাজ্যৰ কেইবাগৰাকীও প্রতিভাৱান ফুটবলাৰে ঐশ্বর্যশালী প্রতিযোগিতাখনত সুন্দৰ প্রদর্শনেৰে দেশৰ ফুটবলপ্রেমীৰ মন জয় কৰাৰ পিছত এইবাৰ নর্থ–ইষ্ট ইউনাইটেডৰ সৈতে তিনি বছৰৰ বাবে চুক্তিবদ্ধ হৈছে প্রতিভাৱান ফুটবলাৰ নবীন ৰাভা৷ বকো বন্দাপাৰৰ খাটাজুলি গাঁৱৰ এটা অতি দৰিদ্র পৰিয়ালৰ সন্তান ৰাভাক অহা বর্ষৰ আই এছ এলত নর্থ–ইষ্ট ইউনাইটেড এফ চিত দেখিবলৈ পোৱা যাব৷
উল্লেখ্য যে বন্দাপাৰৰ কামৰূপা এফ চিত ৰঞ্জিত দাসৰ তত্ত্বাৱধানত ফুট্বলৰ আদিপাঠ গ্রহণ কৰা প্রতিভাৱান খেলুৱৈগৰাকীয়ে ইয়াৰ পূর্বে লাজং দলৰ হৈ খেলাৰ অভিজ্ঞতা লাভ কৰিছিল৷ ভাৰতীয় জুনিয়ৰ দলকো তেওঁ প্রতিনিধিত্ব কৰাৰ সুযোগ পাইছিল৷ আই এছ এলৰ দৰে দেশৰ জনপ্রিয় ফুটবল প্রতিযোগিতাত নবীন ৰাভাই অংশ ল’ব বুলি বাতৰি প্রকাশৰ পিছতে উৎফুল্লিত হৈ পৰিছে বকোৰ খাটাজুলি গাঁওবাসী৷