নিয়মীয়া বাৰ্তা, ৩ মাৰ্চঃ সমাগত পৌৰসভা নিৰ্বাচনৰ প্ৰচাৰৰ কাইলৈ অন্তিম দিন ৷ সেয়ে ৰাজ্যখনৰ আন আন পৌৰসভাৰ লগতে নগাঁও জিলাৰ চাৰিখন পৌৰসভা ক্ৰমে নগাঁও,ধিং, ৰহা আৰু কামপুৰ পৌৰসভাৰ প্ৰচাৰ অভিযান তুংগত উঠিছে ৷ জিলাখনৰ ২৬ টা মহলাযুক্ত নগাঁও পৌৰসভাৰ ২৩ টা মহলাত, কামপুৰ, ৰহা , ধিং পৌৰসভাৰ ১০ টাকৈ মহলাত নিৰ্বাচন অনুষ্ঠিত হব ৷ নগাঁও ,কামপুৰ ,ৰহা পৌৰসভাত বিজেপি অগপ মিত্ৰজোঁট আৰু কংগ্ৰেছ – অসম জাতীয় পৰিষদৰ মিত্ৰশক্তিৰ মাজত প্ৰতিদ্বন্দ্বিতা হব ৷ কেইবাটাও মহলাত নিৰ্দলীয় প্ৰাৰ্থীও প্ৰতিদ্বন্দ্বিতাত অৱতীৰ্ণ হৈছে৷ আজি স্বাস্থ্য মন্ত্ৰী তথা অগপৰ কাৰ্যকৰী সভাপতি কেশব মহন্তই নগাঁও পৌৰসভাত প্ৰতিদ্বন্দ্বিতা কৰা অগপৰ প্ৰৰ্থী ক্ৰমে মনালিছা বৰুৱা ৰহমান , মুক্তা জয়ছোৱাল ,তৌহিদুল ৰহমান আৰু ৰূপালী শইকীয়াৰ হৈ প্ৰচাৰ অভিযান চলাই ৷ এই উপলক্ষে অনুষ্ঠিত সভাত অংশগ্ৰহণ কৰি মন্ত্ৰী মহন্তই কয় – সমগ্ৰ ৰাজ্যৰ পৌৰসভা নিৰ্বাচনত বিজেপি অগপৰ মিত্ৰজোঁটে ভাল ফলাফল প্ৰদৰ্শন কৰিব ৷ ৰাজ্যখনৰ সকলো পৌৰসভাতে আমাৰ ফলাফল ভাল হব ৷ কংগ্ৰেছক কঠোৰ সমালোচনা কৰি মন্ত্ৰীগৰাকীয়ে কয়- কংগ্ৰেছে অপপ্ৰচাৰৰে ৰাইজক বিভ্ৰান্তি কৰিব বিচাৰিছে ৷ কংগ্ৰেছৰ এই অপপ্ৰচাৰৰ কথা ৰাইজে বুজি উঠিছে ৷ অসমৰ ৰাইজ এতিয়া বিজেপি অগপৰ মিত্ৰজোঁটৰ পক্ষত আছে ৷ নগাঁও পৌৰসভা মিত্ৰজোঁটে দখল কৰাতো এশ শতাংশই নিশ্চিত হৈছে ৷ ইপিনে সংবাদ মাধ্যমৰ আগত মন্ত্ৰীগৰাকীয়ে কয়- পৌৰসভা নিৰ্বাচনত বিজেপি অগপৰ সৌহাৰ্দ্যপূৰ্ণ ভাৱে মিত্ৰতা হৈছে ৷ কৰবাত কৰবাত মিত্ৰতাৰ ক্ষেত্ৰত অগাপিছা হয়৷ দুই একত বুন্ধত্বপূৰ্ণ প্ৰতিদন্দিতা হৈছে । মিত্ৰতাক লৈ আমাৰ কোনো সংকোচ নাই ৷ ক্ষোভ নাই । আমি মনখুলি মিত্ৰতা কৰিছোঁ ৷ মন্ত্ৰীগৰাকীৰ লগত জেষ্ঠ অগপ নেতা তথা প্ৰাক্তন মন্ত্ৰী গিৰীন্দ্ৰ কুমাৰ বৰুৱা,নগাঁও জিলা অগপৰ সভাপতি মনি মাধৱ মহন্তকে ধৰি কেইবাগৰাকী অগপ নেতাই অগপৰ প্ৰাৰ্থীৰ হৈ প্ৰচাৰ চলায় ৷ ইপিনে নগাঁও পৌৰসভাত বিজেপিয়ে প্ৰতিদ্বন্দ্বিতা কৰা ২৩ টা মহলাৰ আজি নগাঁও সদৰ সমষ্টিৰ বিধায়ক ৰূপক শৰ্মাই মাৰাথন প্ৰচাৰ অভিযান চলায় ৷ প্ৰচাৰ অভিযানত অংশগ্ৰহণ কৰি বিধায়ক ৰূপক শৰ্মাই কয় – বিজেপি চৰকাৰৰ দিনত নগৰ চহৰৰ লগতে সমগ্ৰ ৰাজ্যখনত দ্ৰুত উন্নয়ন হৈছে ৷ নগাঁও চহৰতো উন্নয়নে নতুন ৰূপ লৈছে ৷ আমাৰ চৰকাৰৰ দিনত হোৱা উন্নয়নৰ বাৱে ৰাইজ এতিয়া বিজেপিৰ প্ৰতি ধাৱমান হৈছে ৷ নগাঁও পৌৰসভা বিজেপি মিত্ৰজোঁটে দখল কৰাটো এশ শতাংশই নিশ্চিত হৈছে ৷ বিজেপিৰ হৈ ৰাজ্যিক পৰ্যায়ৰ কেইবাজনো বিজেপি নেতা ,নগাঁও জিলা বিজেপিৰ সভাপতি অভিজিত নাথ আদিয়ে প্ৰচাৰ অভিযান চলায় ।
প্ৰেৰক কনক হাজৰিকা