বিশেষ বার্তা, ৩১ জানুৱাৰী : ২০২৫ চনৰ মোহন ভাইৰা স্মাৰক বঁটা নলবাৰী জিলাৰ উত্তৰ অঞ্চলৰ আল্লিয়াৰ নাৰায়ণ গাঁৱৰ বিশিষ্ট লোক-সংস্কৃতিৰ সাধক, নাগাৰা নামৰ শিল্পী বিজয় মেধিলৈ আগবঢ়োৱা হৈছে৷ নলবাৰীৰ শ্বহীদ ভৱনত এখন সংবাদ মেলযোগে ঘোষণা কৰে এই বঁটা৷ সদৌ অসম ছাত্র সন্থাৰ উপ–সভাপতি ভৱজিৎ বেজবৰুৱা, সাংগঠনিক সম্পাদক ৰিয়াজুদ্দিন আহমেদ, জিলা ছাত্র সন্থাৰ সভাপতি নিৰুজউদ্দিন আহমেদ, সাধাৰণ সম্পাদক সমৰজ্যোতি মহন্ত, উপদেষ্টা গুণজ্যোতি পাঠক, অক্ষয় ডেকা আৰু নলবাৰী জিলা উন্নতি সভাৰ সভাপতি হোমেশ্বৰ তালুকদাৰ উপস্থিত থকা আজিৰ সংবাদ মেলত কয় যে নলবাৰী জিলা ছাত্র সন্থা আৰু নলবাৰী জিলা উন্নতি সভাই ২০০৯ চনৰ পৰা সংস্কৃতিৰ পথাৰৰ পৰা হেৰাই যাবলৈ ধৰা থলুৱা কলা–সংস্কৃতি সাধনাৰে অসমৰ সংস্কৃতিৰ বৰঘৰ চহকী কৰা বিশিষ্ট শিল্পীক সন্মান প্রদান কৰাৰ বাবে ২০০৯ চনত পুণ্যপ্রভা দত্ত তামুলী, ২০১০ চনত সীতাৰাম ৰায়, ২০১১ চনত মুকুতাৰাম বৰুৱা ওজা, ২০১২ চনত মাণিক শইকীয়া ওজা, ২০১৩ চনত ৰূহীন ৰাভা, ২০১৪ চনত দ্বেজেন গগৈ, ২০১৫ প্রভাত শর্মা, ২০১৬ চনত হৰি বৰবায়ন, ২০১৭ চনত ৰামচৰণ ভৰালী, ২০১৮ চনত লোকনাথ কুটুমক প্রদান কৰা হয় যদিও ২০১৯ৰ ‘কা’ আন্দোলন আৰু ২০২০ত ক’ভিড মহামাৰীৰ পৰিপ্রেক্ষিতত এই বঁটা প্রদান কৰিব পৰা নগ’ল, ২০২১ হৰেকৃষ্ণ তালুকদাৰ, ২০২২ নিকুঞ্জ পাঠক, ২০২৩ অনিৰাম নাথ, ২০২৪ পৰমেশ্বৰ বসুমতাৰীক বটা প্রদান কৰা হয়৷ ১ ফেব্রুৱাৰীত অনুষ্ঠিত হ’ব লগা বঁটা প্রদান অনুষ্ঠানত সদৌ অসম ছাত্র সন্থাৰ সভাপতি উৎপল শর্মা উপস্থিত থাকিব৷ বঁটা প্রদান কৰিব দুবাৰকৈ সাহিত্য অকাডেমি বঁটাপ্রাপক ড০ দীপক কুমাৰ শর্মাই৷ নলবাৰী জিলা পুথিভঁৰাল প্রেক্ষাগৃহত অনুষ্ঠিত হ’বলগীয়া উক্ত বঁটা প্রদান অনুষ্ঠানত বঁটাৰ লগতে নগদ ধন, স্মাৰক, ফুলাম জাপি, ফুলাম গামোচা, মানপত্র, চেলেং, নগদ ধন আদি প্রদান কৰা হ’ব৷ নলবাৰী জিলাৰ উত্তৰ অঞ্চলৰ আল্লিয়াৰ নাৰায়ণ গাঁৱত ১৯৪৬ চনত জন্মগ্রহণ কৰা নাগাৰা নামৰ শিল্পী বিজয় মেধিয়ে ১৯৬২ চনত নাগাৰা নামৰ চর্চা আৰম্ভ কৰিছিল৷ ১৯৭৭ চনৰ পৰা প্রায় ১০০টা নাগাৰা নাম ৰচনা কৰা মেধিয়ে বিভিন্নজন নাগাৰা নামৰ পাঠকৰ জৰিয়তে তেওঁ ৰচনা কৰা নাগাৰা নাম ৰাইজৰ মাজলৈ আগবঢ়াই নিছে৷