নিয়মীয়া বাৰ্তা, ৫ এপ্ৰিল : শাসকীয় গোটৰ মিত্ৰদল অসম গণ পৰিষদ (অগপ) দলৰ ধুবুৰী জিলাৰ সভাপতিৰ দায়িত্ব লাভ কৰিছে প্ৰাক্তন আছু নেতা বিশ্বজিৎ কলিতাই। প্ৰাপ্ত তথ্যনুসৰি, বিগত ৩ এপ্ৰিল তাৰিখে অগপৰ ৰাজ্যিক সভাপতি অতুল বৰাৰ আনুষ্ঠানিক অনুমোদন ক্ৰমে দলটোৰ ধুবুৰী জিলা সমিতিখন নতুনকৈ গঠন কৰা হৈছে। সেই মৰ্মে বিশ্বজিৎ কলিতাক ধুবুৰী জিলাৰ সভাপতিৰ দায়িত্ব প্ৰদান কৰাৰ বিপৰীতে সাধাৰণ সম্পাদকৰ দায়িত্ব লাভ পাইছে দীপক মেধি আৰু আবু বক্কৰ ছিদ্দিকে। উল্লেখ্য, অগপৰ নব-নিৰ্বাচিত সভাপতি কলিতাই ১৯৮৫ চনৰ পৰা ১৯৯০ চনলৈ ধুবুৰী পৌৰসভাৰ অধ্যক্ষৰূপেও দায়িত্ব নিৰ্বাহ কৰিছিল। অসম আন্দোলনৰ সময়ত ধুবুৰীকে ধৰি জিলাখনৰ আগশাৰীৰ ছাত্ৰ নেতাৰূপে ১৯৭৮ চনৰ পৰা ১৯৮৫ চনলৈ সদৌ অসম ছাত্ৰ সন্থাৰ সৈতে জড়িত থকা কলিতাই অগপ দলৰ এগৰাকী প্ৰতিষ্ঠাপক সদস্যও। ইয়াতে উল্লেখনীয় যে, পঞ্চায়ত নিৰ্বাচনৰ পূৰ্বে বিশ্বজিৎ কলিতা অগপৰ ধুবুৰী জিলাৰ সভাপতিৰ দায়িত্ব লভাৰ ঘটনাই বিশেষ তাৎপৰ্য্যবাহী বুলি বিবেচিত হৈছে। অগপৰ জিলা সভাপতিৰ দায়িত্ব লভাৰ পিছত কলিতাই জিলাখনৰ জাতীয়তাবাদী শিৱিৰক অধিক শক্তিশালী, একত্ৰিত কৰিবলৈ সক্ষম হ’ব বুলিও আশা প্ৰকাশ কৰা পোৱা গৈছে দলটোৰ তৃণমূল পৰ্যায়ৰ কৰ্মীসকলে।
প্ৰেৰক অমিতাভ চক্ৰৱৰ্তী