বিশেষ বাৰ্তা, ২৪ নৱেম্বৰঃ নামজাৰি নথিপত্র জালিয়াতিৰ সন্দর্ভত কালি অপৰাধ শাখাই গ্রেপ্তাৰ কৰা কামৰূপ মহানগৰ জিলা আয়ুক্তৰ উপ পঞ্জীয়ন শাখাৰ কনিষ্ঠ সহায়ক নিতুল দাসৰ সম্পত্তিয়ে চকু কপালত তুলিছে মহানগৰ আৰক্ষীৰ৷ ২০১৩ চনত চৰকাৰী চাকৰিত নিযুক্তি পোৱা নিতুল দাসে গুৱাহাটীৰ উপ পঞ্জীয়ক কার্যালয়ত কনিষ্ঠ সহায়ক হিচাপে যোগদান কৰিছিল৷ আৰম্ভণিতে খাৰখুলিৰ বনকোঁৱৰ নগৰত ভাড়াঘৰত থকা নিতুল দাসে আলাদিনৰ চাকিস্বৰূপে চৰকাৰী চাকৰিটো যেন লাভ কৰিছিল৷ ২০১৩ চনৰ পৰা ২০২৩ চনলৈ ১০ বছৰ কাল চাকৰি কৰিয়েই প্রায় ৬ কোটি টকাৰ সম্পত্তিৰ মালিক হৈছিল কনিষ্ঠ সহায়ক নিতুল দাস৷ আজি গুৱাহাটীত এখন সংবাদ মেলত এই কথা সদৰী কৰিছে আৰক্ষী আয়ুক্ত দিগন্ত বৰাই। তেওঁ সদৰী কৰা অনুসৰি, নিতুল দাসে উপ পঞ্জীয়ক কার্যালত মূলতঃ ভলিউম বুকৰ সৈতে জৰিত আছিল৷ ভূমাফিয়া চক্রৰ সৈতে লগ লাগি মোটা অংকৰ কমিচনৰ বিনিময়ত নামজাৰি প্রক্রিয়াত জালিয়াতি চলাইছিল নিতুল দাসে৷
#বাৰ্তা ডেস্ক