নিয়মীয়া বাৰ্তা, ২৪ ডিচেম্বৰঃ এদিনীয়া ভ্রমণসূচীৰে আজি অসমত উপস্থিত হ’ব লোকসভাৰ অধ্যক্ষ ওম বিৰলা৷ নির্ধাৰিত কার্যসূচী অনুসৰি বৰঝাৰস্থিত গোপীনাথ বৰদলৈ আন্তর্জাতিক বিমানবন্দৰত অৱতৰণ কৰাৰ পাছত লোকসভাৰ অধ্যক্ষ বিৰলাই পোনে পোনে অসম বিধানসভালৈ আহিব৷ দিনৰ ১১.২০ বজাত অসম বিধানসভাৰ বিধায়কসকলক সম্বোধন কৰিবলগীয়া লোকসভাৰ অধ্যক্ষ বিৰলাই চেণ্ট্ৰেল হলত ‘অসম বিধানসভা লাইভ–ডিজিটেল প’র্টেল’ আনুষ্ঠানিকভাৱে মুকলি কৰিব৷ এই অনুষ্ঠানত মুখ্যমন্ত্রী ড০ হিমন্ত বিশ্ব শর্মা, অসম বিধানসভাৰ অধ্যক্ষ বিশ্বজিৎ দৈমাৰী, বিৰোধী দলপতি দেৱব্রত শইকীয়া আৰু মন্ত্রী–বিধায়কসকল উপস্থিত থাকিব৷ ইয়াৰ পাছত লোকসভাৰ অধ্যক্ষ বিৰলাই শ্রীমন্ত শংকৰদেৱ কলাক্ষেত্রত অনুষ্ঠিতব্য ‘প্রতিদিন এছিভার্ছ’ শীর্ষক এক অনুষ্ঠানত পৌৰোহিত্য কৰিব৷ এই অনুষ্ঠানটোত মুখ্যমন্ত্রী ড০ হিমন্ত বিশ্ব শর্মা আৰু অৰুণাচল প্রদেশৰ উপ–মুখ্যমন্ত্রী চাওনা মেইন উপস্থিত থকাৰ কথা৷