নিয়মীয়া বাৰ্তা, ৫ ছেপ্টেম্বৰঃ ভাদ মাহত উৎকট গৰম। উৎকট গৰমে সমগ্ৰ ৰাজ্যবাসীক বাৰুকৈয়ে জ্বলাকলা খুৱাইছে। আজি এই উৎকট গৰমত নগাঁও জিলাৰ উৰিয়াগাঁও চকত এজন লোক ঢলি পৰি মৃত্যুমুখত পৰে। চাহপাত বেপাৰ কৰি কোনোমতে পৰিয়াল পোহপাল দিয়া পুৰণিগুদাম চলচলি মুচলিম গাঁৱৰ চিৰাজুল হকে চাহপাত বিক্ৰীৰ বাবে উৰিয়াগাঁৱৰ এখন দোকানত সোমাইছিল। দোকানত সোমোৱাৰ সময়তে অকস্মাৎ ঢলি পৰে আৰু লোকজনৰ মৃত্যু হয়। স্থানীয় লোকে জানিবলৈ দিয়া অনুসৰি লোকজন ঢলি পৰাৰ পিছতে ১০৮ এম্বুলেন্স সেৱাক স্থানীয় লোকে কেইবাবাৰো খবৰ দিয়াৰ পিছত উপস্থিত নোহোৱাৰ বাবে লোকজনৰ মৃত্যু হয়। আজিৰ এই ঘটনাক উৰিয়াগাঁওবাসীয়ে ধ্বিকাৰ দিয়ে। ১০৮ সেৱাৰ এম্বুলেন্স সময়মতে উপস্থিত হোৱা হ’লে আজি লোকজনৰ মৃত্যু নহ’ল হয় বুলি উল্লেখ কৰি স্থানীয় লোকে ১০৮ সেৱাক ধ্বিকাৰ দিয়ে। লোকজনৰ কৰুণ মৃত্যুত উৰিয়াগাঁও অঞ্চলৰ লগতে চলচলি অঞ্চলত শোকৰ ছাঁ পৰিছে।
প্ৰেৰক তপন কটকী