নিয়মীয়া বাৰ্তা, ২৩ ডিচেম্বৰ : লখিমপুৰ জিলাৰ বগীনদী থানাৰ অন্তৰ্গত ১৫নং ৰাষ্ট্ৰীয় ঘাইপথৰ মাজগাঁৱত কালি নিশা ১১ বজাত সংঘটিত পথ দুৰ্ঘটনাত এজন যুৱক থিতাতে নিহত হোৱাৰ উপৰি আনজন গুৰুতৰভাৱে আহত হয় । নিহত যুৱকজন হৈছে বগীনদী দৈনিক বজাৰস্থিত সোণোৱাল ৱাইন শ্বপৰ স্বত্বাধিকাৰী তথা তাৰিয়ণী গাঁৱৰ নিৱাসী ললিত শইকীয়াৰ পুত্ৰ বিক্ৰম সোণোৱাল (২১)। গুৰুতৰভাৱে আহত যুৱকজন হৈছে একে গাঁৱৰে মাণিক হাজৰিকাৰ পুত্ৰ জিতুল সোণোৱাল (২২) । ঘটনাৰ বিৱৰণী মতে, কালি ৰাতি দুয়ো যুৱকে ৱাইন শ্বপ বন্ধ কৰি এ এছ ০৭ ডব্লিউ ৫৮৩৬ নম্বৰৰ পালছাৰ বাইকখনেৰে বগীনদীৰ পৰা তাৰিয়ণী ঘৰলৈ গৈ থকা অৱস্থাত ১৫ নং ৰাষ্ট্ৰীয় ঘাইপথৰ মাজগাঁৱত পথৰ দাঁতিত থকা পকা খুঁটাত খুন্দা মৰাৰ ফলত দুৰ্ঘটনাটো সংঘটিত হয় । দুৰ্ঘটনাটোত বাইক চালক বিক্ৰম সোণোৱাল থিতাতে নিহত হোৱাৰ লগতে আৰোহী জিতুল সোণোৱালৰ এখন ভৰি ভাঙি গুৰুতৰভাৱে আহত হয় । দুয়োজন যুৱককে বগীনদী আৰক্ষীয়ে উদ্ধাৰ কৰি লখিমপুৰ চিকিৎসা মহাবিদ্যালয়লৈ প্ৰেৰণ কৰে।
প্ৰেৰক ভুবন গৌতম