নিয়মীয়া বাৰ্তা, ১৬ ডিচেম্বৰঃ পঞ্চায়ত আৰু গ্রামোন্নয়ন বিভাগত সংঘটিত ব্যাপক অনিয়মৰ তদন্ত কৰিবলৈ তদাৰকী আৰু দুর্নীতি নিবাৰকক নির্দেশ দিছে গুৱাহাটী উচ্চ ন্যায়ালয়ে৷ আমগুৰি নৱনির্মাণ সমিতি নামৰ সংস্থাটোৱে দাখিল কৰা ১৯/২০২১ নম্বৰৰ ৰাজহুৱা স্বার্থজড়িত আবেদনৰ ভিত্তিত উচ্চ ন্যায়ালয়ে ছমাহৰ ভিতৰত তদন্ত কৰি প্রতিবেদন দাখিল কৰিবলৈ নির্দেশ দিছে৷
২০১২–১৩ বিত্তীয় বর্ষৰ পৰা ২০১৬–১৭ বিত্তীয় বর্ষলৈ পঞ্চায়ত আৰু গ্রামোন্নয়ন বিভাগৰ অধীনত প্রায় ৫০০ কোটি টকাৰ অনিয়ম সংঘটিত হোৱাৰ অভিযোগ উত্থাপন হৈছিল৷ ৰাজ্যৰ চাৰি জিলা ক্রমে চৰাইদেউ, গোলাঘাট, শিৱসাগৰ আৰু যোৰহাটত এম জি এনৰেগা আৰু প্রধানমন্ত্রী আৱাস যোজনা ৰূপায়ণত অনিয়ম সংঘটিত হোৱাৰ তথ্য পোহৰলৈ আহিছিল৷ ভুৱা হিতাধিকাৰীৰ নামত ধন আবণ্টন দি একাংশ দুর্নীতিগ্রস্ত বিষয়া–কর্মচাৰীয়ে আত্মসাৎ কৰা বুলি অভিযোগ উত্থাপন হৈ আহিছে৷
আনহাতে, উক্ত বিত্তীয় বর্ষত সংঘটিত এই অনিয়মৰ তথ্য প্রকাশ পাইছিল মহাগাণনিকৰ প্রতিবেদনতো৷ যাৰ ভিত্তিত আমগুৰি নৱনির্মাণ সমিতিয়ে গুৱাহাটী উচ্চ ন্যায়ালয়ত এই অনিয়মৰ তদন্ত বিচাৰি ৰাজহুৱা স্বার্থজড়িত আবেদন দাখিল কৰে৷ এই আবেদনৰ শুনানিৰ সময়ত যোৱা ২৮ ছেপ্টেম্বৰত চৰকাৰী পক্ষই সদৰী কৰে যে এই অনিয়ম সন্দর্ভত ভিজিলেঞ্চ আৰক্ষী থানাত ১/২০১৯ নম্বৰ গোচৰ ৰুজু কৰা হৈছে৷ কিন্তু পৰৱর্তী সময়ত উচ্চ ন্যায়ালয়ৰ মজিয়াত প্রকাশ পায় যে ৰাজ্য চৰকাৰে এই গোচৰটোত প্রাথমিক তদন্ত কৰিবলৈ অনুমতি প্রদান কৰা নাই৷ সেয়েহে উচ্চ ন্যায়ালয়ে কিয় তদাৰকী আৰু দুর্নীতি নিবাৰকক এই অনুমতি প্রদান কৰা হোৱা নাই, সেয়া অৱগত কৰিবলৈ চৰকাৰক নির্দেশনা দিয়ে৷ পুনৰ কালি চৰকাৰী পক্ষই এখন শপতনামাযোগে কয় যে এই তদন্তৰ বাবে দুর্নীতি নিবাৰকে যাৱতীয় পদক্ষেপ গ্রহণ কৰিছে৷ ইয়াৰ ভিত্তিতে উচ্চ ন্যায়ালয়ে পঞ্চায়ত আৰু গ্রামোন্নয়নৰ অনিয়মৰ তদন্ত কৰি ছমাহত প্রতিবেদন দাখিল কৰিবলৈ দুর্নীতি নিবাৰকক উচ্চ ন্যায়ালয়ে নির্দেশ দিছে৷