নিয়মীয়া বাৰ্তা, ৰূপহীহাট, ২৬ মাৰ্চঃ ৰাজ্যত এতিয়াও অব্যাহত আছে ড্ৰাগছৰ বিৰুদ্ধে অভিযান৷ ৰূপহীহাটৰ কাৱৈমাৰী আৰক্ষীয়ে ড্ৰাগছৰ বিৰুদ্ধে চলাই আছে মাৰাথন অভিযান৷ কাৱৈমাৰী আৰক্ষী চকীৰ ভাৰপ্ৰাপ্ত বিষয়া অৰ্পন শইকীয়াৰ নেতৃত্বত চলিছিল এই অভিযান৷ আৰক্ষীৰ অভিযানত এজন কুখ্যাত ড্ৰাগছ ব্যৱসায়ী আটক হৈছে৷ ধৃতজন ৰফিকুল ইছলাম ওৰফে গণ্ডা বুলি জানিব পৰা গৈছে ৷ দীৰ্ঘদিন ধৰি ৰফিকুল ওৰফে গণ্ডাৰে চলাই গৈছিল ড্ৰাগছৰ ৰমৰমীয়া বেহা৷ ড্ৰাগছ ব্যৱসায়ী গণ্ডাৰৰ পৰা আৰক্ষীয়ে ৬ টা কণ্টেইনাৰ ভৰ্তি হিৰোইনৰ লগতে ৬ টা খালী কণ্টেইনাৰ জব্দ কৰে৷ ইতিমধ্যে আৰক্ষীয়ে ধৃত ড্ৰাগছ ব্যৱসায়ী গণ্ডাৰক জেল হাজতলৈ প্ৰেৰণ কৰিছে৷