মন্ত্রী ব্যস্ত দলীয় ৰাজনীতিত হোৰাহোৰে বৃদ্ধি আলু–পিঁয়াজৰ দাম

নিয়মীয়া বাৰ্তা ২৮ আগষ্টঃ  মৰাত্মক ক’ৰোনা ভাইৰাছৰ সংক্রমণ প্রতিৰোধৰ বাবে ঘোষণা কৰা লকডাউনে ৰাজ্যৰ অর্থনৈতিক ক্ষেত্রত ব্যাপক প্রভাৱ পেলোৱা পৰিলক্ষিত হৈছিল৷ লকডাউনৰ সময়ছোৱাত খাদ্য–সামগ্রীৰ পৰা আৰম্ভ কৰি শাক–পাচলি, মাছ–মাংস, ফল–মূল সকলোৰে ব্যাপক মূল্যবৃদ্ধিয়ে সাধাৰণ ৰাইজক জুৰুলা কৰিছে৷ অর্থনৈতিক কাম–কাজ চলিবলৈ অনুমতি প্রদান কৰি লকডাউন শিথিল কৰাৰ পিছতো বজাৰৰ পৰা আঁতৰা নাই মূল্যবৃদ্ধিৰ আতংক৷ বিয়াগোম যোগান বিভাগৰ নিষ্ক্রিয়তাৰ সুযোগ লৈ অসাধু ব্যৱসায়ীয়ে দিনক দিনে বৃদ্ধি কৰিছে খাদ্য–সামগ্রীৰ মূল্য৷ শেহতীয়াকৈ বজাৰত অত্যধিক হাৰত বৃদ্ধি পাইছে আলু–পিঁয়াজৰ মূল্য৷ পাইকাৰী আৰু খুচুৰা বজাৰত আলু–পিঁয়াজৰ ব্যাপক মূল্যবৃদ্ধিয়ে পুনৰ মাধমাৰ সোধাইছে সাধাৰণ গ্রাহকক৷ প্রাপ্ত তথ্য অনুসৰি খুচুৰা বজাৰত প্রতি কুইণ্টল আলুৰ মূল্য ৩,৩০০ টকা পর্যন্ত বৃদ্ধি হৈছে৷ সেয়েহে খুচুৰা বজাৰতো সমান্তৰালভাৱে বৃদ্ধি পাইছে আলুৰ মূল্য৷ সম্প্রতি বজাৰত প্রতিকিলো আলু ৪০ টকা দৰত বিক্রী কৰা হৈছে৷ তিনি দিন পূর্বলৈ খুচুৰা বজাৰত প্রতিকেজি আলুৰ মূল্য আছিল ৩০ৰ পৰা ৩৫ টকা৷ অর্থাৎ সম্প্রতি বজাৰত আলুৰ মূল্য ১৭.৫ শতাংশ বৃদ্ধি হৈছে৷ সেইদৰে পিঁয়াজৰ মূল্যও খুচুৰা আৰু পাইকাৰী বজাৰত বৃদ্ধি হৈছে৷ সম্প্রতি খুচুৰা বজাৰত প্রতি কিলোগ্রাম পিঁয়াজ ৩৫ টকাত বিক্রী হৈ আছে৷ পূর্বে এই মূল্য আছিল ২৫ৰ পৰা ৩০ টকা৷ উল্লেখ্য যে যোগান বিভাগে আলু–পিঁয়াজৰ মূল্য নির্ধাৰণ কৰি দিছে যদিও –সেয়া বজাৰত উপলব্ধ নহয়৷ বিভাগীয় নিষ্ক্রিয়তাৰ বাবে একাংশ অসাধু ব্যৱসায়ীয়ে দাম বৃদ্ধি কৰি আহিছে৷ যোগান বিভাগে নির্ধাৰণ কৰা অনুসৰি বজাৰত প্রতি কিলোগ্রাম আলু ৩৪–৩৭ টকা মূল্যত বিক্রী কৰিব লাগে৷ কিন্তু বজাৰত ব্যৱসায়ীয়ে প্রতি কিলোগ্রাম আলুৰ বাবদ গ্রাহকৰ পৰা আদায় কৰিছে ৪০ টকা পর্যন্ত৷ সেইদৰে শেহতীয়াকৈ ব্যাপক হাৰত মূল্যবৃদ্ধি ঘটিছে মিঠাতেলৰ৷ প্রাপ্ত তথ্য অনুসৰি প্রতি লিটাৰ মিঠাতেলত ১০–১৫ টকাকৈ বৃদ্ধি পোৱা পৰিলক্ষিত হৈছে৷ ব্রেণ্ড অনুযায়ী মিঠাতেলৰ মূল্য সুকীয়া সুকীয়া যদিও প্রতিটো ব্রেণ্ডে বৃদ্ধি কৰিছে মূল্য৷ উল্লেখ্য যে ক’ভিড ১৯ৰ বাবে সৃষ্টি হোৱা পৰিস্থিতিৰ বাবে খুচুৰা বজাৰত খাদ্য–সামগ্রীৰ মূল্য দেশজুৰি বৃদ্ধি পাইছে৷ শেহতীয়া তথ্য অনুসৰি জুলাই মাহত দেশৰ বজাৰত মাছ–মাংসৰ মূল্য ১৮.৮১ শতাংশ বৃদ্ধি হৈছে৷ সেইদৰে দাইল জাতীয় খাদ্য–সামগ্রীৰ মূল্যবৃদ্ধি হৈছে ১৫.৯২ শতাংশ৷ ইয়াৰ উপৰি মিঠাতেলৰ ১২.৪১ শতাংশ, মচলাৰ ১৩.২৭ শতাংশ, চাউলৰ ১১.২৯ শতাংশ মূল্যবৃদ্ধি ঘটিছে৷ সকলো খাদ্য–সামগ্রীৰ ক্ষেত্রত মূল্যবৃদ্ধিৰ হাৰ হৈছে ৯.৬২ শতাংশ৷ লক্ষণীয় যে পূর্বেও খাদ্য–সামগ্রীৰ মূল্যবৃদ্ধিয়ে সাধাৰণ ৰাইজক জুৰুলা কৰাৰ পিছতো যোগান বিভাগৰ নিষ্ক্রিয়তাক লৈ ব্যাপক প্রতিক্রিয়াৰ সৃষ্টি হৈছে৷ বিশেষকৈ বিভাগীয় মন্ত্রী ফণীভূষণ চৌধুৰীয়ে এইক্ষেত্রত কোনো ব্যৱস্থা গ্রহণ নকৰাক লৈ তেওঁৰ দক্ষতাক লৈ প্রশ্ণ উত্থাপন হৈছে৷ তৎসত্ত্বেও গা নলৰিল বিয়াগোম বিভাগটোৰ৷ যাৰ সুযোগ লৈ বজাৰত অসাধু ব্যৱসায়ীয়ে অব্যাহত ৰাখিছে মূল্যবৃদ্ধি৷ বিশেষকৈ বিভাগীয় মন্ত্রীজন ৰাজনীতিৰ অংকত ব্যস্ত হৈ থকাৰ সুযোগতে অসাধু ব্যৱসীয়ে এইদৰে মূল্যবৃদ্ধিৰে সাধাৰণ ৰাইজক মাধমাৰ শোধোৱা বুলিও চর্চা লাভ কৰিছে৷