নিয়মীয়া বাৰ্তা, ১২ মাৰ্চ: ৰঙিয়াৰ বিছেন্নালাত অনুষ্ঠিত ৭৩তম শ্ৰীশ্ৰীমহাবিষ্ণু যজ্ঞ মহোৎসৱত আজি প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেডৰ অধ্যক্ষা তথা পৰিচালন সঞ্চালিকা ৰিণিকি ভূঞা শৰ্মা উপস্থিত হয় । ধৰ্মীয় অনুষ্ঠানটোৰ পূৰ্ণ আহুতিৰ দিনা উপস্থিত হৈ ৰিণিকি ভূঞা শৰ্মাই পূজা-অৰ্চনা কৰে। নামনি অসমৰ অন্যতম এই বৃহৎ ধৰ্মীয় কাৰ্যসূচীত অংশগ্ৰহণ কৰা ৰিণিকি ভূঞা শৰ্মাই সকলোৰে মংগল কামনাৰে প্ৰভু বিষ্ণুৰ ওচৰত প্ৰাৰ্থনা জনায় । সহস্ৰাধিক ধৰ্মপ্ৰাণ ৰাইজ উপস্থিত থকা অনুষ্ঠানটোত তেওঁক গামোচা, জাপি আৰু শৰাইৰে মহোৎসৱ পৰিচালনা সমিতিয়ে সম্বৰ্ধনা জনায় । আনহাতে মহোৎসৱত স্থানীয় বিধায়ক তথা ৰাজ্যিক বিজেপিৰ সভাপতি ভৱেশ কলিতায়ো অংশগ্ৰহণ কৰে । উল্লেখ্য যে প্ৰতিবছৰে উক্ত যজ্ঞ মহোৎসৱত ৰাজ্যৰ বিভিন্ন প্ৰান্তৰ পৰা সহস্ৰাধিক লোক উপস্থিত হৈ প্ৰভু বিষ্ণুৰ ওচৰত পূজা-অৰ্চনা কৰে । পাঁচ দিনীয়া বিস্তৃত কাৰ্যসূচীৰ এই মহোৎসৱত এক উৎসৱমুখৰ পৰিৱেশে বিৰাজ কৰা দেখা যায় ।
প্ৰেৰক ফাৰুক হুছেইন