🔹 দক্ষিণ শালমাৰা থানাত এজাহাৰ দাখিল
নিয়মীয়া বাৰ্তা, ৬ ফেব্ৰুৱাৰী : দক্ষিণ শালমাৰা মহাবিদ্যালয়ৰ এগৰাকী অধ্যাপকক আক্ৰমণৰ ঘটনাই সমগ্ৰ অঞ্চলটোক জোকাৰি যায় ৷ জানিব পৰা মতে, ১০/১৫ জনীয়া উদণ্ড যুৱকৰ দলে কালি মহাবিদ্যালয়ৰ চৌহদত প্ৰৱেশ কৰি অধ্যাপকগৰাকীক আক্ৰমণ কৰে ৷ এই আক্ৰমণৰ ভিডিঅ’ সামাজিক মাধ্যমতো ভাইৰেল হৈ পৰিছে ৷ মহাবিদ্যালয়ৰ বাৰাণ্ডাৰ পৰা উদণ্ড যুৱকৰ দলটোৱে অধ্যাপকগৰাকীক টানি খেলপথাৰলৈ নি এনেদৰে আক্ৰমণ কৰে ৷ অধ্যাপকগৰাকী দক্ষিণ শালমাৰা মহাবিদ্যালয়ৰ অসমীয়া বিভাগৰ মুৰব্বী ড০ মজিবৰ ৰহমান বুলি জানিব পৰা গৈছে ৷
আক্ৰমণৰ বলি হোৱা অধ্যাপকগৰাকীয়ে ইতিমধ্যে দক্ষিণ শালমাৰা থানাত এখন এজাহাৰ দাখিল কৰিছে । ঘটনাটোক কেন্দ্ৰ কৰি জিলাখনত তীব্ৰ প্ৰতিক্ৰিয়াৰ সৃষ্টি হৈছে ৷ ইফালে, অধ্যাপকগৰাকীক আক্ৰমণ কৰা ঘটনাক লৈ দক্ষিণ শালমাৰা মহাবিদ্যালয়ত অধ্যাপক আৰু কৰ্মচাৰীয়ে আজি প্ৰতিবাদ সাব্যস্ত কৰাৰ লগতে ঘটনাৰে জড়িত দুৰ্বৃত্তক কৰায়ত্ত কৰি কঠোৰ শাস্তি বিহিবলৈ দাবী জনাইছে।
প্ৰেৰক ফাৰহাদ আহমেদ