বাৰ্তা ব্যুৰো, ৩১ আগষ্টঃ গোৱালপাৰা জিলাৰ কৃষ্ণাইত আজি সন্ধিয়া সংঘটিত এক শোকাবহ পথ দুৰ্ঘটনা সংঘটিত হয় ৷ দ্ৰুতবেগী আল্ট্ৰা বাছৰ খুন্দাত প্ৰাণ হেৰুৱালে দুই যুৱকে ৷ আজি সন্ধিয়া প্ৰায় ৭ বজাত কৃষ্ণাইৰ ১৭ নং ৰাষ্ট্ৰীয় ঘাইপথত সংঘটিত হয় এই দুৰ্ঘটনা ৷ জানিব পৰা মতে গুৱাহাটীৰ পৰা গোৱালপাৰা অভিমুখী এখন তীব্ৰবেগী আল্ট্ৰা বাছ (এএছ ২৫ ইচি ১১৬৫) আৰু বিপৰীত দিশৰ পৰা আহি থকা মটৰ চাইকেল (এএছ১৮ জে ৫৪৮৮) এখনৰ মাজত মুখামুখি সংঘৰ্ষৰ ফলতে সংঘটিত হয় এই শোকাবহ দুৰ্ঘটনা ৷ বাছৰ খুন্দাত মটৰ চাইকেলখনত থকা তিনি আৰোহী মটৰ চাইকেলসহ উফৰি পৰে। ফলত ঘটনাস্থলীতে নিহত হয় দুজন যুৱক ৷ আন জন যুৱকৰ অৱস্থা সংকটজনক৷ ইফালে দুৰ্ঘটনাৰ পিছতে ঘটনাস্থলীত উত্তপ্ত পৰিস্থিতিৰ সৃষ্টি হয়৷ একাংশ উত্তেজিত ৰাইজে কিছু ক্ষতিসাধন কৰে বাছখন৷ অৱশেষত ঘটনাস্থলীত কৃষ্ণাই আৰক্ষী উপস্থিত হৈ পৰিস্থিতি নিয়ন্ত্ৰণ কৰে৷ আৰক্ষীয়ে নিহত যুৱক দুজনৰ মৃতদেহ উদ্ধাৰ কৰাৰ লগতে আহত জনক ততাতৈয়াকৈ চিকিৎসালয়লৈ প্ৰেৰণ কৰে ৷ দুৰ্ঘটনাত নিহত মটৰচাইকেল আৰোহী ক্ৰমে হাছানুৰ আলী (১৯, পিতা মনোৱাৰ আলী) আৰু মনোৱাৰ হুছেইন (২৩, পিতা ৰমজান আলী) ৷ আনহাতে গুৰুতৰ ভাৱে আহত বাইক আৰোহীজনৰ নাম মহিবুল ইছলাম (১৯. পিতা ছহৰাব আলী ওৰফে গেদা) ৷ মৃত আৰু আহত আটাইৰে ঘৰ কৃষ্ণাইৰ পাখিৰীগুৰিত৷ উল্লেখ্যে যে গুৰুতৰ ভাৱে আহত মহিবুল ইছলামক উন্নত চিকিৎসাৰ বাবে গুৱাহাটীলৈ প্ৰেৰণ কৰিছে চিকিৎসকে ৷
প্ৰেৰক উদিত নাৰায়ণ কলিতা