নিয়মীয়া বাৰ্তা, ৩ মে’ : বৰপেটা লোকসভা সমষ্টিৰ মিত্ৰজোঁটৰ প্ৰাৰ্থী ফণীভূষণ চৌধুৰীৰ হৈ আজি সন্ধিয়া নলবাৰী চহৰত মন্ত্ৰী জয়ন্ত মল্ল বৰুৱাই বিশাল ৰোড শ্ব’ত অংশগ্ৰহণ কৰে। হাতে হাতে বিজেপি আৰু অগপৰ কৰ্মীসকলে পতাকা লৈ “বিজেপি জিন্দাবাদ, অগপ জিন্দাবাদ, ড° হিমন্ত বিশ্ব শৰ্মা জিন্দাবাদ, নৰেন্দ্ৰ মোদী জিন্দাবাদ, জয়ন্ত মল্ল বৰুৱা জিন্দাবাদ, ফণীভূষণ চৌধুৰী জিন্দাবাদ আদি শ্লোগানেৰে চহৰৰ আকাশ বতাহ মুখৰিত কৰি তোলে। “আকৌ এবাৰ মোদী চৰকাৰ” শীৰ্ষক গীতটিৰ তালে তালে কাৰ্যকৰ্তা আৰু সমৰ্থকসকলে নাচি নাচি ৰাইজক আকৰ্ষিত কৰি তোলা পৰিলক্ষিত হয়। নলবাৰী কলেজ ফিল্ডৰ পৰা উলিওৱা এই বিশাল ৰোড শ্বটি বীৰেন গেৰেজ হৈ হাজো ৰোড হৈ পিএনচি পথৰে এনটি ৰোড হৈ চৰকাৰী গৰ্ডন খেলপথাৰত সামৰণি পৰে। সামৰণী অনুষ্ঠানত মন্ত্ৰী জয়ন্ত মল্ল বৰুৱাই নিৰ্বাচনী ভাষণ দিয়ে। ভাষণত মন্ত্ৰী বৰুৱাই কয়- অহা ৭ মে’ত ভোটাৰে মিত্ৰজোটৰ প্ৰাৰ্থীক ভোট দিবলৈ সাজু হৈছে। মিত্ৰজোটৰ প্ৰাৰ্থী ফণীভূষণ চৌধুৰীৰ সমৰ্থন আজি হেজাৰ হেজাৰ লোক ওলাই আহিছে বুলি কয়। ৰাইজে উন্নয়ন বিচাৰে আৰু এই উন্নয়নক লক্ষ্য কৰিয়েই এইবাৰো মিত্ৰজোটৰ প্ৰাৰ্থীক ৰাইজে জয়ী কৰাব।
প্ৰেৰক শ্বাহ আলম আহমেদ