নিয়মীয়া বাৰ্তা ডিজিটেল, ২৮ মাৰ্চঃ কলকাতা নাইট ৰাইডার্ছৰ বিৰুদ্ধে পৰাজয়ৰ পিছত বেটিং সন্দর্ভত পেছাদাৰী হোৱাৰ প্রয়োজন বুলি উল্লেখ কৰে ৰাজস্থান ৰয়েলছৰ অধিনায়ক ৰিয়ান পৰাগে৷ গুৱাহাটীত অনুষ্ঠিত আই পি এলৰ খেলখনত কলকাতাৰ বিৰুদ্ধে ৮ উইকেটত পৰাস্ত হয় ৰাজস্থান ৰয়েলছ৷ ইয়াৰ বাবে নিজকে দোষাৰোপ কৰে ৰাজস্থান দলটোৰ অধিনায়ক ৰিয়ানে৷ কলকাতাৰ এই জয়ৰ নায়ক আছিল ডি ক’ক৷ তেওঁ শতক কৰাৰ পৰা বঞ্চিত হৈছিল যদিও এই হনিংছ আছিল অতি বিশেষ৷ কাৰণ গুৱাহাটীৰ পিটচ বেটিঙৰ বাবে সহজ নাছিল আৰু তেওঁ ক্রিজত থাকি বেটিং কৰি কেকেআৰক ছিজনৰ প্রথমটো জয় প্রদান কৰিছিল৷ ইয়াৰ পিছতে চলিত আইপিএলৰ প্রথম দুখন মেচত একেৰাহে পৰাজয়ৰ সন্মুখীন হ’বলগীয়া হৈছে আৰআৰ৷ ইফালে আৰ আৰৰ অধিনায়ক ৰিয়ান পৰাগে আইপিএলত দলৰ ক্রমাগত পৰাজয়ৰ বাবে দুখ প্রকাশ কৰি কয় যে তেওঁৰ বেটিঙৰ ক্ষেত্রত অলপ পেছাদাৰী হোৱাটো প্রয়োজন৷ খেলৰ অন্তত তেওঁ কয় যে ৰাজস্থানে হয়াৰ পৰা শিক্ষা লৈ ভুলৰ পুনৰাবৃত্তি নকৰিবলৈ চেষ্টা কৰিব আৰু সতেজ মানসিকতাৰে চিএছকেৰ বিৰুদ্ধে খেলপথাৰত নামিব৷ ৩০ মার্চত ৰাজস্থান ৰয়েলছে গুৱাহাটীত চেন্নাই ছুপাৰ কিংছৰ বিৰুদ্ধে আইপিএলৰ পৰৱর্তী খেলত মুখামুখি হ’ব৷