নিয়মীয়া বাৰ্তা, ১২ মাৰ্চ : শোণিতপুৰৰ বালিপৰা দীঘলী মানশিৰিৰ বাসিন্দা, শিক্ষক-সাহিত্যিক ছত্ৰমান চুব্বাই লাভ কৰিছে ২০২৩ বৰ্ষৰ সাহিত্য অকাডেমিৰ অনুবাদ পুৰস্কাৰ (নেপালী ভাষা ক্ষেত্ৰত) । বিশিষ্ট সাহিত্যিক ড০ লক্ষ্মীনন্দন বৰাৰ কালজয়ী উপন্যাস “কায়কল্প”ক অসমীয়া ভাষাৰ পৰা নেপালী ভাষালৈ একেই নামেৰে অনুবাদ কৰাৰ স্বীকৃতি হিচাপে সাহিত্য অকাডেমিয়ে চুব্বাক এই বঁটাৰে পুৰস্কৃত কৰিছে । আজি বিশিষ্ট সাহিত্যক, শিক্ষক ছত্ৰমান চু্ব্বাক বালিপৰা শিক্ষাখণ্ডৰ অধীনৰ খেলমাটি আদাবাৰী মধ্য ইংৰাজী বিদ্যালয়ত বিশেষ সম্বৰ্ধনা জনোৱা হয়। বিদ্যালয়খনৰ শিক্ষক ৰাজীৱ শইকীয়াই আঁত ধৰা অনুষ্ঠানটোত বিদ্যালয়খনৰ প্ৰধান শিক্ষয়িত্ৰী ৰজী শইকীয়াই বিদ্যালয় কৰ্তৃপক্ষৰ হৈ চু্ব্বাক ফুলাম গামোচা, কলম, বুদ্ধ মূৰ্তিৰে সম্বৰ্ধনা জ্ঞাপন কৰে । অনুষ্ঠানত ভাষণ প্ৰসংগত চু্ব্বাই নিজৰ সাহিত্য সাধনাৰ বিশেষ অৱগত কৰি সমন্বয়ৰ মাজেদি সাহিত্য কাৰ্য সম্পাদন কৰি যাবলৈ নৱপ্ৰজন্মক আহ্বান জনায় । অনুষ্ঠানটোত বালিপৰা খণ্ড উন্নয়ন বিষয়া কাৰ্যালয়ৰ অৱসৰপ্ৰাপ্ত বি ডি অ’ খগেন তামুলী, সমন্বয় সাহিত্য গোষ্ঠী অসমৰ মূল সচিব প্ৰাঞ্জল প্ৰতিম বৰা, খেলমাটি আদাবাৰী মধ্য ইংৰাজী বিদ্যালয়ৰ সমূহ শিক্ষাগুৰু, ছাত্ৰ-ছাত্ৰী, শুভাকাংক্ষী উপস্থিত থাকে । উল্লেখ্য যে ছত্ৰমান চুব্বা খেলমাটি আদাবাৰী মধ্য ইংৰাজী বিদ্যালয়ৰ জ্যেষ্ঠ সহকাৰী শিক্ষক হিচাপে কৰ্মৰত ।
প্ৰেৰক প্ৰাঞ্জল প্ৰতিম