নিয়মীয়া বাৰ্তা ২১ জুলাইঃ ৰাজ্যত চোৰাং গৰু সৰবৰাহ চলি থকাৰ সময়তে নগাঁও জিলাৰ চামগুৰি আৰক্ষী থানাৰ আৰক্ষীয়ে আজি বিয়লি চামগুৰিৰ পৰা দুখন গৰু ভৰ্তি ট্ৰাক জব্দ কৰাৰ লগতে ৬ জন লোকক আটক কৰিবলৈ সক্ষম হয় ।জানিব পৰা মতে চামগুৰি সমষ্টিৰ অন্তৰ্গত গেৰুৱামুখ আৰু পুঠিখাইটি অঞ্চলৰ পৰা কাছাৰলৈ বুলি এ এছ ০ ১ ডি ডি ০৬৮৫ আৰু এ এছ ০১ জি চি ২০৩৭ নম্বৰৰ ট্ৰাক দুখন মুঠ ৪৮ টা গৰু লৈ আহি থকা অৱস্থাত চামগুৰি আৰক্ষী থানাৰ ভাৰ প্ৰাপ্ত আৰক্ষী বিষয়া কৃষ্ণ কান্ত দলৈৰ নেতৃত্বত এটা আৰক্ষী দলে এক গোপন সুত্ৰৰ পম খেদি চামগুৰি আৰক্ষী থানাৰ সমিপত তথা ৩৭ নং ৰাষ্ট্ৰীয় ঘাইপথত অভিযান চলাই অবৈধ ভাৱে সৰবৰাহ কৰিবলৈ চেষ্টা কৰা গৰু ভৰ্তি ট্ৰাক দুখন জব্দ কৰাৰ লগতে গাড়ী দুখনৰ চালক পৰিচালক সহ ৬ জনলোকক আৰক্ষীয়ে আটক কৰে ৷ গাড়ী দুখনৰ পৰা আৰক্ষীয়ে আটক কৰা ক্ৰমে আব্দুল ওৱাল, আতাবুৰ ৰহমান, দিলদাৰ হুছেইন, ইমাজুদ্দিন, আনচাৰুদ্দিন বৰভূঞা আৰু অহিদ মিঞাক বৰ্তমান চামগুৰি আৰক্ষী থানাত জেৰা অব্যাহত ৰাখিছে বুলি আৰক্ষীৰ এক সুত্ৰই জানিবলৈ দিয়ে ৷