বিশেষ বাৰ্তা, ১২ এপ্ৰিল: যোৱা ৬ মাৰ্চত সোণাৰি পৌৰসভাৰ ১৬টা ৱাৰ্ডৰ নিৰ্বাচন অনুষ্ঠিত হৈ যোৱাত নৱ-নিৰ্বাচিত ৱাৰ্ড কমিছনাৰসকলৰ আজি শপত গ্ৰহণ অনুষ্ঠান অনুষ্ঠিত কৰা হয়। এই উপলক্ষে চৰাইদেউ জিলা প্ৰশাসনৰ সৌজন্যত উপায়ুক্ত কাৰ্যালয়ৰ সভাকক্ষত আজি নৱ-নিৰ্বাচিত ৱাৰ্ড কমিচনাৰসকলৰ উপস্থিতিত জিলা উপায়ুক্ত পল বৰুৱাই জেষ্ঠ ৱাৰ্ড কমিছনাৰ তিলক চন্দ্ৰ নেওগক সোণাৰি পৌৰসভাৰ পৌৰপতি হিচাপে শপত বাক্য পাঠ কৰোৱায়। ইয়াৰ পিছতে ৱাৰ্ড কমিচনাৰসকলৰ সিদ্ধান্ত মৰ্মে উপ-পৌৰপতি হিচাপে স্বাক্ষৰ গগৈক নিৰ্বাচিত কৰাৰ লগতে ১৫ গৰাকী ৱাৰ্ড কমিচনাৰক চৰকাৰী নিয়ম অনুসৰি নৱ-নিৰ্বাচিত পৌৰপতি তিলক চন্দ্ৰ নেওগে শপত গ্ৰহণ কৰোৱায়। ভাষণ প্ৰসংগত নৱ-নিৰ্বাচিত পৌৰপতি তিলক চন্দ্ৰ নেওগে সোণাৰি পৌৰসভা এলেকাৰ ৰাইজে নিৰ্বাচনত জয়ী কৰোৱাৰ বাবে ধন্যবাদ জ্ঞাপন কৰাৰ লগতে নগৰ খনৰ উন্নয়নৰ ক্ষেত্ৰত বিশেষ পদক্ষেপ গ্ৰহণ কৰিব বুলি মন্তব্য কৰে। আজিৰ অনুষ্ঠানত অতিৰিক্ত উপায়ুক্ত জাবেদ আৰমানৰ উপৰিও সমাজত সেৱক লক্ষীনাথ তাচাও উপস্থিত থাকে।
প্ৰেৰক দীপাংকৰ পাল