নিয়মীয়া বাৰ্তা, ১ নৱেম্বৰ : গোৱালপাৰা জিলাৰ কৃষ্ণাইৰ শিয়ালীত আজি সন্ধিয়া সংঘটিত হয় এক ভয়ংকৰ অগ্নিকাণ্ড ৷ এই ভয়ংকৰ অগ্নিকাণ্ডত নিমিষতে ভস্মীভূত হয় এটা পৰিয়ালৰ দুটা গৃহ৷ শিয়ালীৰ আজিজুল ইছলামৰ বাসগৃহত সংঘটিত হৈছে এই অগ্নিকাণ্ড৷ সন্ধিয়া আজিজুল ইছলামৰ গৃহত হঠাৎ দাওদাওকৈ জুই জ্বলি উঠে৷ তাৰ পাছতে হাহাকাৰ লাগে পৰিয়ালৰ মাজত৷ স্থানীয় লোকৰ সহযোগত জুই নমুবালৈ চেষ্টা কৰে যদিও ভয়ংকৰ জুইত নিমিষতে পাকঘৰসহ এটা বাসগৃহ ভস্মীভূত হৈ পৰে৷ ঘৰৰ ভিতৰত থকা কাপোৰ কানি, কাগজ-পত্ৰ, আলমিৰা, পালেং, আৰু পাকঘৰৰ থকা বাচন-বৰ্তন, খাদ্য সামগ্ৰী সকলো জুইত জাহ যায় ৷ ঘটনাস্থলীত আৰক্ষীৰ লোক আহি স্থানীয় ৰাইজৰ সহযোগ জুই নুমাবলৈ সক্ষম হয় যদিও বহু লক্ষাধিক টকাৰ সম্পত্তি ক্ষতিগ্ৰস্থ হয়৷ পৰিয়ালৰ লোকে জানিবলৈ দিয়া মতে, পাকঘৰৰ গেছ চিলিণ্ডাৰৰ পৰা অগ্নিকাণ্ডৰ সূত্ৰপাত ঘটে ৷ উল্লেখ্য যে, অগ্নিনিৰ্বাপক বাহিনীক খবৰ দিয়ে যদিও বহু পলমকৈ ঘটনাস্থলীত আহি উপস্থিত হয়৷ অগ্নিনিৰ্বাপক বাহিনী আহি পোৱাৰ আগতে স্থানীয় ৰাইজৰ সহযোগত আৰক্ষীয়ে জুই নিৰ্বাপন কৰিবলৈ সক্ষম হয় ৷
প্ৰেৰক বেনজিন বড়ো