বিশেষ বাৰ্তা, ৫ এপ্ৰিলঃ ডিব্ৰুগড়ৰ গৌৰৱ তথা ময়ূৰী নৃত্য নিকেতনৰ অধ্যক্ষ আৰু প্ৰতিষ্ঠাপক ময়ূৰী দাসে ৰত্নমণি’ বঁটা লাভ কৰা ৰাজ্যৰ প্ৰথমগৰাকী ব্যক্তি হিচাপে চিহ্নিত হৈ ডিব্ৰুগড়ৰ লগতে ৰাজ্যখনলৈ গৌৰৱ কৰিয়াই আনিছে। শেহতীয়াকৈ কলকাতাৰ নেতাজী ইনড’ৰ ষ্টেডিয়ামত অনুষ্ঠিত এক গাম্ভীৰ্যপূৰ্ণ অনুষ্ঠানত এই সন্মান প্ৰদান কৰা হয়। শাস্ত্ৰীয় নৃত্য আৰু অসমীয়া সংস্কৃতিৰ প্ৰসাৰৰ বাবে সকলোৰে পৰিচিত ময়ূৰী দাসে পৰিবেশন কলাৰ ক্ষেত্ৰখনত যথেষ্ট উল্লেখযোগ্য অৱদান আছে। ৰাষ্ট্ৰীয় পৰ্যায়ত তেওঁৰ স্বীকৃতি অসম তথা সমগ্ৰ উত্তৰ-পূৰ্বাঞ্চলৰ বাবে এক গৌৰৱৰ ক্ষণ। এই কৃতিত্বই অসমৰ চহকী সাংস্কৃতিক ঐতিহ্য আৰু ডিব্ৰুগড়ৰ প্ৰতিভাক ৰাষ্ট্ৰীয় প্ৰেক্ষাপটত উজ্জ্বলাই তুলিছে। এনে কৃতিত্বই বহু যুৱ শিল্পীক শাস্ত্ৰীয় নৃত্যৰ জগতখনত নিজৰ সপোন সাধন কৰিবলৈ অনুপ্ৰাণিত কৰিব বুলি আশা কৰা হৈছে। ২০০৩ চনত প্ৰতিষ্ঠা হোৱা ময়ুৰী নৃত্য নিকেতন ময়ুৰী দাসৰ মালিকানাধীন উক্ত নৃত্য বিদ্যালয়। নৃত্য বিদ্যালয়ত মূলতঃ আন প্ৰতিটো নৃত্যৰ ৰূপ আৰু প্ৰকাৰৰ লগত জড়িত হৈ ভাৰতনাট্যম শিকোৱা হয়। বৰ্তমান নৃত্য বিদ্যালয়খনত ৩০০ ছাত্ৰ-ছাত্ৰী আছে বুলি জানিব পৰা গৈছে।
প্ৰেৰক বিভাস দুৱৰা