🔹 ‘নিউজ লাইভ’ৰ জীৱনজোৰা সাধনা–বর্ষশ্রেষ্ঠ অসমীয়া বঁটা
ষ্টাফ ৰিপ’ৰ্টাৰ, ১৯ জানুৱাৰী : ওপজা মাটিৰ পৰশেৰে উজ্জীৱিত উত্তৰ–পূর্বাঞ্চলৰ প্রথমটো ছেটেলাইট চেনেল ‘নিউজ লাইভ’ৰ তৰফৰ পৰা ঘোষণা কৰা হৈছে ২০২৪ বর্ষৰ জীৱনজোৰা সাধনা আৰু বর্ষশ্রেষ্ঠ অসমীয়া বঁটা৷ এইবাৰ জীৱনজোৰা সাধনা বঁটা আগবঢ়োৱা হৈছে বিশিষ্ট সংগীত শিল্পী দ্বীপেন বৰুৱালৈ৷ সেইদৰে বর্ষশ্রেষ্ঠ অসমীয়া বঁটাৰে সন্মানিত কৰা হ’ব প্রখ্যাত সাহিত্যিক তথা সাহিত্য অকাডেমিপ্রাপক অনুৰাধা শর্মা পূজাৰীক৷ সংগীতৰ ক্ষেত্রখনলৈ ৫ দশকৰো অধিককাল আগবঢ়োৱা অতুলনীয় অৱদানৰ বাবে দ্বীপেন বৰুৱাক জীৱনজোৰা সাধনা বঁটা প্রদান কৰা হ’ব৷ আনহাতে, অসমীয়া সাহিত্য জগতলৈ আগবঢ়োৱা অনবদ্য বৰঙণিৰ বাবে অনুৰাধা শর্মা পূজাৰীক ‘নিউজ লাইভ’–এ প্রদান কৰিব বর্ষশ্রেষ্ঠ অসমীয়া বঁটা৷ ‘নিউজ লাইভ’ৰ সপ্তদশ বর্ষপূর্তি অনুষ্ঠানত দুয়োগৰাকী সন্মানীয় ব্যক্তিকে আনুষ্ঠানিকভাৱে এই সন্মান প্রদান কৰা হ’ব৷