নিয়মীয়া বাৰ্তা, ৫ এপ্ৰিলঃ ৰাজধানীৰ গাতে লাগি থকা এক্সপাৰ্ট একাডেমি সাম্প্ৰতিক সময়ৰ এখন আগশাৰীৰ ব্যক্তিগত শিক্ষা প্ৰতিষ্ঠান। পৰিচালন সঞ্চালক তথা অধ্যক্ষ মৃদুল কলিতাৰ আশাশুধীয়া প্ৰচেষ্টা আৰু ঐকান্তিকতাৰ গুণত শিক্ষানুষ্ঠানখনে আজি আগশাৰীৰ শিক্ষানুষ্ঠান হিচাপে আত্মপ্ৰকাশ কৰিবলৈ সক্ষম হৈছে। কামৰূপৰ নগৰবেৰাৰ জকাইচুকীয়া মালঞ্চা গাঁৱৰ সুসন্তান মৃদুল কলিতাই কিছুবছৰৰ পূৰ্বে গাঁৱৰ পৰা গৈ শিক্ষাব্ৰতী মানসিকতাৰে আত্মোৎসৰ্গা কৰি এক্সপাৰ্ট একাডেমিক আগুৱাই নিয়াৰ সমান্তৰালকৈ কলিতাই পিছপৰি ৰোৱা নাই সাহিত্য সাধনাতো। অলপতে মহাশয় প্ৰকাশন পৰিষদ, অসম নামৰ সংস্থাই সাহিত্য সাধনাৰ অৰিহণাৰ বাবে এক্সপাৰ্ট একাডেমিৰ অধ্যক্ষ মৃদুল কলিতাক ড° মামণি ৰয়চম গোস্বামী স্মৃতিত সাহিত্য সুৰভি বঁটাৰ বাবে বাছনি কৰাৰ খবৰে বৃহত্তৰ নগৰবেৰাবাসীক সন্তোষ দিছে। সাহিত্যপ্ৰেমীৰ লগতে নগৰবেৰা অঞ্চলৰ ৰাইজে সাহিত্যিক মৃদুল কলিতালৈ সুস্বাস্থ্যৰ কামনা আৰু আগলৈ অধিক সাহিত্য সামনা অটুট ৰখাৰ শুভাশীষ যাচিছে।
প্ৰেৰক সঞ্জীৱ কুমাৰ দাস