🔹 ছাত্ৰ-ছাত্ৰীৰ মাজত পৰম্পৰাগত খেল-ধেমালি, বিয়ানাম প্ৰতিযোগিতা
নিয়মীয়া বাৰ্তা, ৩০ জানুৱাৰী : ইতিহাসৰ পাতনিত সোণালী স্বাক্ষৰ বহন কৰি অহা আহোম স্বৰ্গদেউসকলৰ ৰাজত্ব কালৰে পৰা স্বদেশ, স্ব-জাতিৰ কল্যাণার্থে তাই আহোমসকলে অতি শ্ৰদ্ধাৰে পালন কৰি আহিছে মে-ডাম-মে-ফী উৎসৱ। ৰাজ্যৰ অন্যান্য প্ৰান্তৰ লগতে ঢকুৱাখনাতো আজিৰে পৰা তাই সাংস্কৃতিক গৱেষণা আৰু বিকাশ কেন্দ্ৰ, অসমৰ উদ্যোগত আৰু ঢকুৱাখনাৰ আঞ্চলিক তাই আহোম ছাত্ৰ সন্থাৰ সহযোগত কেন্দ্ৰৰ প্ৰাংগণত উদযাপন কৰা হৈছে ঢকুৱাখনা কেন্দ্ৰীয় মে-ডাম-মে-ফী উৎসৱ। বৃহস্পতিবাৰে পুৱা পতাকা উত্তোলনেৰে দুদিনীয়া বৰ্ণিল কাৰ্যসূচীৰ শুভাৰম্ভ কৰে তাই সাংস্কৃতিক গৱেষণা আৰু বিকাশ কেন্দ্ৰ, অসমৰ সভাপতি জিতেন গগৈয়ে। ইয়াৰ পিছতে জগদীশ গগৈৰ সোঁৱৰণত ছাত্ৰ-ছাত্ৰীৰ মাজত অনুষ্ঠিত হোৱা সাহিত্য আৰু পৰম্পৰাগত খেল-ধেমালি প্ৰতিযোগিতা উদ্বোধন কৰে শিক্ষাবিদ গৰ্কী বুঢ়াগোহাঁয়ে। ছাত্ৰ-ছাত্ৰীৰ মাজত অনুষ্ঠিত হোৱা আকস্মিক বক্তৃতা, চিত্ৰাংকন আদিৰ লগতে কুকুৰা যুঁজ, ৰছী টনা আদি পৰম্পৰাগত খেল-ধেমালি প্ৰতিযোগিতাত ঢকুৱাখনাৰ কেইবাখনো বিদ্যালয়ৰ শতাধিক ছাত্ৰ-ছাত্ৰীয়ে অংশগ্ৰহণ কৰি তাই সাংস্কৃতিক গৱেষণা আৰু বিকাশ কেন্দ্ৰৰ প্ৰাংগণ মুখৰিত কৰি তোলে। বিয়লি ১ বজাৰ পৰা অনুৰাধা গগৈৰ সোঁৱৰণত অনুষ্ঠিত হয় বিয়ানাম প্ৰতিযোগিতা।বিয়ানামৰ বিশেষজ্ঞ প্ৰমীলা গগৈ কোঁৱৰে উদ্বোধন কৰা প্ৰতিযোগিতাত কেইবাটাও দলে অংশগ্ৰহণ কৰি বিয়ানামেৰে মুখৰ কৰি তোলে কেন্দ্ৰৰ প্ৰাংগণ। বিয়লি ৪ বজাত আৰম্ভ হোৱা বান ফী পূজাৰে প্ৰথম দিনৰ কাৰ্যসূচীৰ সফল সামৰণি পৰে। কাইলৈ পুৱা মৈদাম তৰ্পণ, চাওলুং চ্যুকাফাৰ প্ৰতিমূৰ্তিত মাল্যাৰ্পণৰ পিছতেই বাৰেৰহণীয়া সাংস্কৃতিক শোভাযাত্ৰা উলিওৱা হ’ব।দুপৰীয়া কেন্দ্ৰীয় মে-ডাম-মে-ফী উৎসৱৰ স্মৃতিগ্ৰন্থ “বানফাই” উন্মোচন কৰিব সদৌ অসম বুঢ়াগোহাঁই বংশাৱলী সভাৰ প্ৰধান সম্পাদক ড০ ৰঞ্জন বুঢ়াগোহাঁয়ে। দুপৰীয়া ১২ বজাত অনুষ্ঠিত হ’ব মুকলি সভা। তাই বিকাশ কেন্দ্ৰৰ সভাপতি জীতেন গগৈ আৰু উদযাপন সমিতিৰ সভাপতি প্ৰদীপ কুমাৰ বুঢ়াগোহাঁয়ে সভাপতিত্ব কৰিব লগা মুকলি সভাখন উদ্বোধন কৰিব চিমেন চাপৰি মহাবিদ্যালয়ৰ সহকাৰী অধ্যাপক ড০ ৰুণু গোহাঁয়ে। মুকলি সভাত ঢকুৱাখনাৰ বিধায়ক নৱ কুমাৰ দলে, লখিমপুৰৰ সাংসদ প্ৰদান বৰুৱাই মুখ্য অতিথি আৰু নিৰ্দিষ্ট বক্তা হিচাপে প্ৰবীণ শিক্ষাবিদ, লেখক বগেন গগৈ আৰু অমিয় কুমাৰ সন্দিকৈ আৰু বিশিষ্ট অতিথি হিচাপে ঢকুৱাখনা সম- জিলাৰ আয়ুক্ত কাৰ্তিক কলিতা, ঢকুৱাখনা পৌৰসভাৰ পৌৰপতি ৰাজীৱ বৰুৱা, চুতীয়া যুৱ সন্মিলন, অসমৰ সাধৰণ সম্পাদক কৌস্তুভ কিশোৰ চুতীয়া, লখিমপুৰ জিলা তাই আহোম ছাত্ৰ সন্থাৰ উপদেষ্টা আইনিকেন চাংমাইৰ লগতে বহুকেইগৰাকী প্ৰশাসনিক বিষয়া, সমাজকৰ্মীয়ে অংশগ্ৰহণ কৰিব।
প্ৰেৰক পুলকজ্যোতি বৰা