📌সমাজৰ পাৰদৰ্শী লোকসকলক উলিয়াই আনিবলৈকে পঞ্চায়ত নিৰ্বাচনত সংশোধন ঘটোৱা হৈছে – মুখ্যমন্ত্ৰী
নিয়মীয়া বাৰ্তা, ২ এপ্ৰিলঃ ৰাজ্য চৰকাৰৰ বিভিন্ন উন্নয়ণমূলক জনমুখী প্ৰকল্পৰ অন্তৰ্গত ঐতিহাসিক চিনামৰা বাগিছাৰ এক নান্দনিক প্ৰাকৃতিক পৰিবেশৰ মাজত নিৰ্মাণ সম্পূৰ্ণ কৰি উলিওৱা যোৰহাট সন্মিলন কেন্দ্ৰটো আজি ৰাজ্যৰ মুখ্যমন্ত্ৰী ড. হিমন্ত বিশ্ব শৰ্মাই শুভ উদ্বোধন কৰে। চিনামৰাত উপস্থিত হোৱা মুখ্যমন্ত্ৰীগৰাকীয়ে কেন্দ্ৰটো ফিটা কাটি শুভ উদ্বোধন কৰাৰ পাছতে সমগ্ৰ পৰিসৰতো পৰিদৰ্শন কৰে আৰু কেন্দ্ৰটোৰ পৰিসৰত এটা গছ পুলিও ৰোপণ কৰে। ইয়াৰ পাছতে সাংবাদিকেৰে হোৱা এক মত বিনিময় অনুষ্ঠানত মূখ্যমন্ত্ৰীগৰাকীয়ে কয় যে সন্মিলন কেন্দ্ৰটোৱে যোৰহাটৰ এক বহুদিনীয়া অভাৱ পুৰণ কৰিব।কাষতে নিৰ্মাণাধীন অৱস্থাত থকা সংযুক্ত জিলা উপায়ুক্তৰ কাৰ্যালয়টোৰ লগত মিলি দুয়োটাই যোৰহাটৰ উন্নয়নত এক অনন্য মাত্ৰা প্ৰদান কৰিব মূখ্যমন্ত্ৰীগৰাকীয়ে উল্লেখ কৰে। আগন্তুক পঞ্চায়ত নিৰ্বাচনক কেন্দ্ৰ কৰি সোধা এক প্ৰশ্নৰ উত্তৰত মূখ্যমন্ত্ৰী ড. শৰ্মাই কয় যে এইবাৰৰ পঞ্চায়তৰ নিৰ্বাচনত ৱাৰ্ড মেম্বাৰৰ কোনো দল বা দলীয় চিহ্ন নাথাকিব। নিৰ্বাচন জিকা হৰাতোৱেই মূল উদেশ্য নহয় বুলি মূখ্যমন্ত্ৰীগৰাকীয়ে কয় যে সমাজৰ উন্নয়ন হে মূল বিষয়। সমাজৰ সচেতন দক্ষ্য লোকজনক উলিয়াই আনিবলৈকে পঞ্চায়তী ব্যৱস্থাত এনে পৰিবৰ্তন কৰা বুলি মন্তব্য কৰি তেওঁ কয় যে দল ব্যৱস্থাত সমাজৰ পাৰদৰ্শীলোকসকল প্ৰায়েই নিৰ্বাচন খেলিবলৈ ওলায় নাহিবও পাৰে। কিন্তু আঞ্চলিক আৰু জিলা পঞ্চায়ত পৰ্যায়ত দলীয় চিহ্নৰে নিৰ্বাচনত অৱতীৰ্ণ হব লাগিব বুলিও তেওঁ কয়। ইফালেদি শেহতীয়াকৈ সমগ্ৰ দেশতে চৰ্চাত থকা ৱাকফ বৰ্ড সন্দৰ্ভত সোধা এক প্ৰশ্নৰ উত্তৰত তেওঁ এয়া সময়ৰ আহ্বান বুলি মন্তব্য কৰি লগতে কয় যে ৭৫ বছৰে নোহোৱা এটা কাম অতি সাহসেৰে দেশৰ প্ৰধান মন্ত্ৰী নৰেন্দ্ৰ মোডীয়ে কৰিবলৈ ওলাইছে। উল্লেখনীয় যে প্ৰায় ২০ কোটি টকা ব্যয় সাপেক্ষে নিৰ্মাণ সম্পূৰ্ণ কৰা সন্মিলন কেন্দ্ৰটোৰ মুঠ আসন ১২০খন। কেন্দ্ৰটোত এটা একজিকিউটিভ লাউঞ্চ, এটা সংবাদ সন্মিলন কক্ষ, এটা ডাংনিং হল, মুট ৭টা ছুইট কক্ষকে আদি কৰি অনান্য কক্ষ আছে। পৰৱৰ্তী সময়ত কেন্দ্ৰটোৰ ডাইনিং হলত প্ৰায় তিনিশ লোকৰ উপস্থিতিত কোনো প্ৰশিক্ষণ আদিৰ ব্যৱস্থা কৰিব পাৰিব বুলিও মূখ্যমন্ত্ৰীয়ে উল্লেখ কৰে। সন্মিলন কেন্দ্ৰটো উদ্ধোধনৰ সময়ত মূখ্যমন্ত্ৰীগৰাকীক বিত্তমন্তী অজন্তা নেওগ, পৰিবহণ বিভাগৰ অধ্যক্ষ পল্লৱলোচন দাস, স্থানীয় বিধায়ক হিতেন্দ্ৰ নাথ গোস্বামী, ভাস্কৰ জ্যোতি বৰুৱা, ৰূপজ্যোতি কুৰ্মীকে প্ৰমূখ্য কৰি জিলা প্ৰশাসনৰ বিষয়াসকলে সংগ দিয়ে।
প্ৰেৰক নৱজ্যোতি তামুলী