বিশেষ বার্তা, ৪ জানুৱাৰী : গুৱাহাটীৰ হেঙেৰাবাৰীস্থিত মহানগৰ জিলা আয়ুক্ত কার্যালয়ৰ সমীপৱর্তী ৰয়েল ডাইন ৰেস্তোৰাঁৰ সভাকক্ষত এক গাম্ভীর্যপূর্ণ গ্রন্থ উন্মোচনী সভা অনুষ্ঠিত হয়৷ সভাৰ প্রাৰম্ভণিতে প্রাক্তন প্রধানমন্ত্রী প্রয়াত ড০ মনমোহন সিঙৰ বিদেহ আত্মাৰ সদগতিৰ কামনার্থে ঈশ্বৰৰ ওচৰত এক মিনিট সময় মৌন প্রার্থনা জনোৱা হয়৷ ইয়াৰ পিছতেই লেখিকা বিজু বৰাই অনুবাদ কৰা ‘বিভিন্ন ৰোগৰ নিৰাময়’ শীর্ষক গ্রন্থখন ‘নিয়মীয়া বার্তা’ৰ সম্পাদক নৰেশ কলিতাই উন্মোচন কৰে৷ সভাত বিশেষভাৱে আমন্ত্রিত অতিথি হিচাপে উপস্থিত থাকে কবি–জ্যেষ্ঠ সাংবাদিক তথা কামৰূপ মহানগৰ জিলা সাহিত্য সভাৰ নৱনির্বাচিত সম্পাদক অৰুণ মহন্ত৷ সভাত উপস্থিত থাকে আন এগৰাকী আমন্ত্রিত অতিথি, ফার্মাচিষ্ট চিদানন্দ পাটোৱাৰী৷ সভাৰ আঁত ধৰে লেখিকা বিজু বৰাই৷ উল্লেখ্য যে খানাপাৰাত চলি থকা অসম প্রকাশন পৰিষদৰ গ্রন্থমেলাৰ ৯১ আৰু ৯২ নম্বৰ বিপণীত গ্রন্থখন গ্রন্থপ্রেমী ক্রেতাৰ বাবে উপলব্ধ হ’ব বুলি লেখিকাই সদৰী কৰিছে৷