নিয়মীয়া বাৰ্তা, ১২ নৱেম্বৰ : ৰাজ্যজুৰি পোহৰৰ উৎসৱ দীপাৱলীৰ ৰং-আনন্দৰ মাজতে সোণাৰি চাপৰিত আজি সংঘটিত হয় এক ভয়াৱহ অগ্নিকাণ্ড ৷ তথ্য মতে, সোণাৰি চাপৰি আৰক্ষী চকীৰ অন্তৰ্গত ন কুৰৈগুৰি গাঁৱৰ এঘৰত আজি পুৱা ৯.৩০ বজাত হঠাতে হোৱা অগ্নিকাণ্ডত ৮ লক্ষাধিক টকাৰ সা-সম্পত্তি নষ্ট হয় ৷ জানিব পৰা মতে, আজি পুৱাৰ ভাগতে শইকীয়াৰ পাকঘৰৰ খেৰৰ চালিত হঠাতে জুইৰ শিখা দেখি চিঞৰ-বাখৰ কৰাত পৰিয়াল আৰু প্ৰতিবেশী লোক আহি জুই নুমুৱাবলৈ চেষ্টা কৰি থকাৰ সময়তেই ঢকুৱাখনাৰ পৰা অগ্নিনিৰ্বাপক বাহিনীৰ গাড়ী আহি জুই নুমুৱাবলৈ সক্ষম হয় যদিও তেতিয়ালৈকে গৃহটো জ্বলি ছাই হৈ যায় ৷ আনহাতে, ৰাইজৰ তৎপৰতাত শইকীয়াৰ আনটো গৃহ ৰক্ষা পৰে যদিও বিস্তৰ ক্ষতি হয় ৷ পিছত সোণাৰি চাপৰি আৰক্ষী ঘটনাস্থলীত উপস্থিত হৈ পৰিস্থিতিৰ বুজ লয় যদিও অগ্নিকাণ্ডৰ কাৰণ জানিব পৰা নাই। শ্বৰ্ট চাৰ্কিটৰ বাবেই অগ্নিকাণ্ড হোৱা বুলি অনুমান কৰা হৈছে ৷
প্ৰেৰক ৰাজেশ বুঢ়াগোহাঞি