নিয়মীয়া বার্তা, ১৮ ডিচেম্বৰঃ সন্ত্রাসবাদীৰে জড়িত থকা সংস্থাৰ পৰা আজমল ফাউণ্ডেচনে বৰঙণি লাভ কৰা বুলি লিগেল ৰাইটছ অবজাৰভেটৰীয়ে (এল আৰ অ’) কৰা অভিযোগক লৈ সৃষ্টি হৈছে ব্যাপক প্রতিক্রিয়া৷ ইয়াৰ মাজতে এই অভিযোগ খণ্ডন কৰি অহা এ আই ইউ ডি এফৰ সভাপতি তথা সাংসদ বদৰুদ্দিন আজমলক পুনৰ উভতি ধৰিছে সংস্থাটোৱে৷ আজমল ফাউণ্ডেচনৰ বিৰুদ্ধে এক অপপ্রচাৰ চলোৱা বুলি কৰা অভিযোগ সন্দর্ভত প্রতিক্রিয়া প্রকাশ কৰি এল আৰ অ’ই টুইটাৰযোগে কয়– ‘এই তথ্যক অপপ্রচাৰ বুলি আখ্যা নিদিব৷ আজমল ফাউণ্ডেচনলৈ বৰঙণি আগবঢ়োৱা আই এইচ এইচ নামৰ সংগঠনটোৰ আল–কায়দাৰ সৈতে সম্পর্ক থকাৰ কথা ইতিমধ্যে তুৰস্ক চৰকাৰে প্রমাণ কৰিছে৷ সেয়া নৰেন্দ্র মোদী বা অমিত শ্বাহে কৰা নাই৷’
আনহাতে, টুইটাৰত এল আৰ অ’ই কয় যে ভাৰত চৰকাৰৰ গৃহ মন্ত্রালয়ত দাখিল কৰা এফ চি আৰ এৰ ভংগৰ প্রতিবেদনক লৈ তেওঁলোকৰ স্থিতি এতিয়াও দৃঢ়৷ এই প্রতিবেদনৰ প্রতিটো দফাক লৈ আইনীভাৱে প্রত্যাহ্বান জনাবলৈও তেওঁলোক সাজু বুলি উল্লেখ কৰিছে টুইটাৰত৷ এই প্রসংগত এল আৰ অ’ই কয়– ‘ভাৰতত ইছলামিক মৌলবাদীৰ পৃষ্ঠপোষক পি এফ আইৰ সৈতেও আই এইচ এইচৰ সম্পর্ক আছে৷ অর্থাৎ পি এফ আই, আজমল ফাউণ্ডেচন আৰু আই এইচ এইচে মিলি মৌলবাদ বিয়পোৱাৰ লক্ষ্য বান্ধি লৈছে৷’
উল্লেখ্য যে লিগেল ৰাইটছ অবজাৰভেটৰীয়ে বদৰুদ্দিন আজমল নেতৃত্বাধীন আজমল ফাউণ্ডেচনলৈ বিদেশী সংস্থাই বৰঙণি আগবঢ়োৱা পুঁজিক লৈ প্রশ্ণ উত্থাপন কৰি আহিছে৷ পুঁজি আগবঢ়োৱা বিদেশৰ কেইবাটাও সংস্থাৰ সৈতে সন্ত্রাসবাদী সংগঠনৰ সম্পর্ক আছে বুলি এল আৰ অ’ই অভিযোগ কৰি আহিছে৷ এইক্ষেত্রত আজমল ফাউণ্ডেচনৰ লগতে আনফ’ৰ ফাউণ্ডেচনেও এনে সংস্থাৰ পৰা ধন লাভ কৰা বুলি এল আৰ অ’ই সদৰী কৰিছিল৷
বিগত সময়ছোৱাত এফ চি আৰ এৰ অধীনত লাভ কৰা ধনৰ অপব্যৱহাৰ কৰিছে বুলিও আজমল ফাউণ্ডেচনৰ বিৰুদ্ধে সংগঠনটোৱে প্রকাশ কৰিছে৷ তেওঁলোকে প্রকাশ কৰা অনুসৰি আজমল ফাউণ্ডেচনে মুঠ ৭০ কোটি টকা লাভ কৰিছিল যদিও ইয়াৰে মাত্র দুই কোটি টকাহে শিক্ষাৰ ক্ষেত্রত তেওঁ ব্যয় কৰিছে৷ অৱশ্যে এল আৰ অ’ই উত্থাপন কৰি অহা অভিযোগ প্রত্যাখ্যান কৰি আহিছে সাংসদ বদৰুদ্দিন আজমলে৷ এই সন্দর্ভত প্রতিক্রিয়া প্রকাশ কৰি বদৰুদ্দিন আজমলে মুখ্যমন্ত্রীৰ কার্যালয়ক উত্থাপিত অভিযোগৰ তদন্ত কৰিবলৈ আহ্বান জনাইছে৷ তদন্ত হ’লে সকলো কথা স্পষ্ট হৈ পৰিব বুলিও মন্তব্য কৰিছে সাংসদ আজমলে৷