নিয়মীয়া বাৰ্তা, ২৭ ডিচেম্বৰ : নিয়মীয়া বাৰ্তা কাকতৰ সৰ্থেবাৰীৰ জ্যেষ্ঠ সাংবাদিক নকুল তালুকদাৰক আজি প্ৰদান কৰা হল শ্বহীদ সাংবাদিক পৰাগ কুমাৰ দাস সোৱঁৰণী নিষ্ঠাৱান সাংবাদিকতা বঁটা। বিগত ২৬ বছৰ ধৰি সংবাদ ক্ষেত্ৰখনৰ লগত সংপৃক্ত হৈ থকা নকুল তালুকদাৰে বিগত প্ৰায় সাত বছৰ ধৰি সদৌ অসম সাংবাদিক সন্থাৰ সাধাৰণ সম্পাদক হিচাপে কাৰ্যনিৰ্বাহ কৰি আছে। তদন্ত মুলক বাতৰিক অধিক গুৰুত্ব প্ৰদান কৰা নকুল তালুকদাৰে বিগত সময় চোৱাত নৈতিকতাৰে ৰাইজৰ স্বাৰ্থক অগ্ৰাধিকাৰ দি সাহসেৰে বাতৰি পৰিবেশন কৰি আহিছে। সংবাদৰ ক্ষেত্ৰত আপোচহীন ভাৱে কাম কৰি থকা নকুল তালুকদাৰ এগৰাকী কবি আৰু সাংস্কৃতিক কৰ্মী হিচাপেও পৰিচিত। প্ৰভাৱশালী সাংবাদিক হিচাপে পৰিচিত জ্যেষ্ঠ সাংবাদিক নকুল তালুকদাৰে সাপ্তাহিক নীলাচল কাকতৰ জৰিয়তে সংবাদ ক্ষেত্ৰখনত ভৰি দিছিল। অসমৰ সাংবাদিক সকলৰ বিভিন্ন সমস্যা সম্পৰ্কত দৃঢ়তাৰে মাত মাতি থকা নকুল তালুকদাৰক আজি শিল্পী সাহিত্যিক সাংবাদিক সুৰক্ষা মঞ্চ অসমে পৰাগ দাস সোঁৱৰণী নিষ্ঠাৱান সাংবাদিকতা বঁটা প্ৰদান কৰে। আজি গুৱাহাটী মহানগৰীৰ অসম সাহিত্য সভাৰ মুখ্য কাৰ্যালয়ৰ লক্ষ্মীৰাম বৰুৱা সদনত আয়োজিত এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰে দৈনন্দিন বাৰ্তাৰ মুখ্য সম্পাদক ভ০ নৰেন হকজৰিকা আৰু ত্ৰিপুৰা কেন্দ্ৰীয় বিশ্ববিদ্যালয়ৰ অৱসৰী অধ্যাপক ড০ বিৰিঞ্চি কুমাৰ বৰুৱাই।সংগ্ৰামী সাংবাদিক নকুল তালুকদাৰক এই বঁটাৰে সন্মানিত কৰাত নলবাৰীৰ লগতে সৰ্থেবাৰী অঞ্চলত আনন্দৰ সৃষ্টি হয়। ইপিনে নকুল তালুকদাৰে এই বঁটা লাভ কৰাত বৰপেটা জিলা সাংবাদিক সস্থা, কয়াকুছি প্ৰেছ ক্লাব, সৰ্থেবাৰী প্ৰেছ ক্লাৱ,সৰুক্ষেত্ৰী কেন্দ্ৰীয় আঞ্চলিক ছাত্ৰ সন্থাৰ সম্পাদক গীতাৰ্থ ডেকা,সাংবাদিক পেন্সনাৰ মৃণাল মল্ল পাটোৱাৰী, সৰ্থেবাৰী লেখিকা সমাৰোহ সমিতিৰ সভানেত্ৰী তথা বিশিষ্ট লেখিকা পাৰ্বতী পাটোৱাৰী,বৰপেটা জিলা সাহিত্য সভাৰ উপ সভাপতি বাণীকান্ত ভূঞা, বিৰিণা গোষ্ঠী-অসমৰ লগতে স্থানীয় বিধায়ক জাকিৰ হুছেইন শিকদাৰ, প্ৰাক্তন বিধায়ক ডাঃ তাৰাপ্ৰসাদ দাস, পাকাবেতবাৰী ব্লক কংগ্ৰেছ কমিটী, গীতিকাৰ নিখিলেশ ডেকা, পক্ষী আৰু মৎস্য সুৰক্ষা সমিতি অসম আদি বিভিন্ন দল সংগঠনে অভিনন্দন জ্ঞাপন কৰে।
প্ৰেৰক আফতাব হুছেইন