নিয়মীয়া বাৰ্তা, ৯ নৱেম্বৰ : নগৰবেৰাৰ মেধিপাৰা উদয়নগৰ আৰু পলাহৰটাৰী গান্ধীনগৰ মিলন বজাৰত যোৱানিশা দুখনকৈ দোকানৰ দুৱাৰৰ তলা ভাঙি লুটপাত চলায় | জানিব পৰা মতে, মেধিপাৰা উদয় নগৰৰ যুৱ ব্যৱসায়ী বিভূতি কলিতাৰ গেলামাল আৰু অনলাইনৰ দোকানত চোৰ সোমায় আৰু লেপটপ এটাৰ লগতে নগদ প্ৰায় পোন্ধৰ হাজাৰ টকা লৈ উধাও হয় চোৰ | একেদৰে গান্ধীনগৰ বজাৰতো আলাউদ্দিন নামৰ ব্যৱসায়ীজনৰ জুৱেলাৰী দোকানত দুৱাৰৰ তলা ভাঙি ভিতৰত চোৰে প্ৰৱেশ কৰে আৰু সোণ-ৰূপৰ গহনা লৈ যায় | ব্যৱসায়ীগৰাকীয়ে উল্লেখ কৰা মতে, প্ৰায় সত্তৰ হাজাৰ টকাৰ গহনা চোৰে লৈ যায় | একে নিশাই দুখনকৈ দোকানত সংঘটিত এনে চুৰিকাণ্ডৰ খবৰে চাঞ্চল্য বিয়পাইছে অঞ্চলজুৰি | দুয়ো আৰক্ষীক যোগাযোগ কৰা বুলিও জানিব পৰা গৈছে |
প্ৰেৰক সঞ্জীৱ কুমাৰ দাস