🔹 চি চি টিভি কেমেৰাত বন্দী চুৰিকাণ্ডৰ দৃশ্য
বিশেষ বাৰ্তা, ১০ অক্টোবৰ : দুৰ্গোৎসৱৰ আনন্দ-উল্লাসৰ মাজতে ঢেকীয়াজুলিৰ ৮নং ৱাৰ্ডৰ দুখনকৈ বিদ্যালয়ত চোৰে চাফাই অভিযান চলোৱা ঘটনাই তীব্ৰ চাঞ্চল্যৰ সৃষ্টি কৰিছে । চি চি টিভি কেমেৰাত আবদ্ধ হ’ল চুৰিকাণ্ডৰ দৃশ্য। উল্লেখ্য যে দুৰ্গোৎসৱৰ আনন্দত সকলো আত্মহাৰা হৈ থকাৰ সময়তে ঢেকীয়াজুলি থানাৰ অন্তৰ্গত ৮নং ৱাৰ্ডত অৱস্থিত ঢেকীয়াজুলি উচ্চতৰ মাধ্যমিক বালিকা বিদ্যালয়ত বুধবাৰে নিশা গভাইত চোৰে প্ৰৱেশ কৰি লক্ষাধিক টকাৰ সামগ্ৰী ধ্বংস কৰাৰ লগতে বহু মূল্যৱান সামগ্ৰী চুৰি কৰি নিয়ে ৷ ঢেকীয়াজুলি উচ্চতৰ মাধ্যমিক বালিকা বিদ্যালয়ৰ অধ্যক্ষ গৌতম ৰাজবংশীয়ে সংবাদ মাধ্যমত জনায় যে চোৰে মাজনিশা প্ৰৱেশ কৰি বিদ্যালয়খনৰ বিজ্ঞানাগাৰৰ মূল্যৱান সামগ্ৰীৰ লগতে বৈদ্যুতিক সামগ্ৰী লণ্ডভণ্ড কৰি চুৰি কৰি নিয়াৰ লগতে ছাত্ৰীসকলে প্ৰস্তুত কৰা বহুকেইখন প্ৰাচীৰ পত্ৰিকা ভাঙি লণ্ডভণ্ড কৰে । আনহাতে, বিদ্যালয়খনৰ শ্ৰেণীকোঠাত থকা শিকন-শিক্ষণ সামগ্ৰীসমূহো ভাঙি লণ্ডভণ্ড কৰে। তদুপৰি দুৰ্বৃত্তৰ দলটোৱে ঢেকীয়াজুলি উচ্চ মাধ্যমিক বালিকা বিদ্যালয়ৰ নিকটৱৰ্তী লোকনায়ক অমিয় কুমাৰ দাস আদৰ্শ প্ৰাথমিক বিদ্যালয়ত ক শ্ৰেণীৰ তলা ভাঙি চৰকাৰে প্ৰদান কৰা শিকন-শিক্ষণ সামগ্ৰী লণ্ডভণ্ড কৰি মূল্যৱান সামগ্ৰীসমূহ চুৰ কৰি নিয়ে । ঢেকীয়াজুলি উচ্চতৰ মাধ্যমিক বালিকা বিদ্যালয়ৰ অধ্যক্ষ গৌতম ৰাজবংশীৰ লগতে লোকনায়ক অমিয় কুমাৰ দাস আদৰ্শ প্ৰাথমিক বিদ্যালয়ৰ প্ৰধান শিক্ষয়িত্ৰী লক্ষী দেৱীয়ে বিদ্যালয়ৰ চুৰিকাণ্ড সন্দৰ্ভত ঢেকীয়াজুলি থানাত এজাহাৰ প্ৰদান কৰি চি চি টিভি কেমেৰাত ধৰা পৰা দুৰ্বৃত্তক কৰায়ত্ত কৰি উচিত শাস্তি বিহিবলৈ আহ্বান জনায়। দুৰ্গোৎসৱৰ আনন্দ-উল্লাসৰ মাজতে চোৰে ঢেকীয়াজুলিৰ ৮নং ৱাৰ্ডৰ দুখন অগ্ৰণী বিদ্যালয়ত চাফাই অভিযান চলোৱা কাৰ্যত বিদ্যালয় কৰ্তৃপক্ষৰ লগতে সচেতন ৰাইজে এই অঞ্চলটোত নৈশ পহৰাৰ ব্যৱস্থা কৰি অপৰাধমূলক কাৰ্যকলাপ ৰোধ কৰিবলৈ আৰক্ষী প্ৰশাসনক আহ্বান জনাইছে।
প্ৰেৰক কল্পজ্যোতি নাথ