🔹 পেলাই থৈ গ’ল পথৰ দাঁতিত : ধিঙত তীব্ৰ উত্তেজনা
বিশেষ বার্তা, ২৩ আগষ্ট : দেশ কঁপোৱা কলকাতাৰ আৰ জি কৰ মেডিকেল কলেজৰ চিকিৎসকক ধর্ষণ আৰু হত্যাৰ প্রতিক্রিয়া মাৰ নৌযাওঁতেহ কালি নগাঁও জিলাৰ ধিঙত ৩ পাষণ্ডৰ কামনাৰ বলি হয় এগৰাকী কিশোৰী৷ ইয়াক কেন্দ্র কৰি সমগ্র নগাঁও জিলাত তীব্র প্রতিক্রিয়াৰ সৃষ্টি হৈছে৷ কালি ফুটগধূলিতে টিডচনৰ পৰা ঘৰলৈ ওভতাৰ সময়ত ধিং–বৰভেটি পথৰ নির্জন ঠাইত নিকৃষ্ট মানসিকতাৰ তিনিটাই ধর্ষণ কৰে৷ জানিব পৰা মতে, ধিং আদর্শ বিদ্যালয়ৰ দশম শ্রেণীৰ ছাত্রীগৰাকী টিউচনৰ পৰা উভতি অহাৰ পথৰ নির্জন এলেকাত ৩ পাষণ্ডৰ কামনাৰ বলি হয়৷ স্থানীয় সূত্রই জনোৱা মতে, ছাত্রীগৰাকী মুমূর্ষু অৱস্থাত নির্জন স্থানত প্রায় এঘণ্টা পৰি ৰয়৷ পথৰ দাঁতিত উলংগ অৱস্থাত পৰি আছিল ছাত্রীগৰাকী৷ পথচাৰীয়ে প্রত্যক্ষ কৰাৰ পিছত সমগ্র ঘটনা পোহৰলৈ আহে৷ পিছত ঘটনাস্থলীত ধিং থানাৰ আৰক্ষী উপস্থিত হৈ ছাত্রীগৰাকীক উদ্ধাৰ কৰি ধিং এফআৰইউ চিকিৎসালয়ত ভর্তি কৰায়৷ কিন্তু অৱস্থা সংকটজনক হোৱাত নগাঁও মেডিকেল কলেজ হাস্পতাললৈ প্রেৰণ কৰে৷ ৩ পাষণ্ডক চিনাক্ত কৰিব পৰা নাই যদিও ঘটনাটোক লৈ ধিঙত তীব্র উত্তেজেনা বিৰাজ কৰিছে৷
প্ৰেৰক কনক হাজৰিকা