🔹 যাত্ৰীবাহী বাছত নিচাযুক্ত দ্ৰব্য সৰবৰাহ
নিয়মীয়া বাৰ্তা, ৪ জানুৱাৰী : বিশ্বনাথ জিলাৰ আৰক্ষী অধীক্ষকৰ নেতৃত্বত আৰক্ষীৰ বিশেষ অভিযানকাৰী দলে চলোৱা এক অভিযানত আজি দুখন যাত্ৰীবাহী বাছত অহা দুজন ড্ৰাগছ পেডলাৰক চতিয়াত আটক কৰে ৷ প্ৰাপ্ত খবৰ মতে, বিশ্বনাথ আৰক্ষীয়ে তেজপুৰৰ পৰা বিশ্বনাথ চাৰিআলি অভিমুখে আহি থকা দুখন যাত্ৰীবাহী বাছত ড্ৰাগছ পেডলাৰ অহাৰ গোপন তথ্য লাভ কৰে ৷ গোপন তথ্যৰ ভিত্তিত আৰক্ষীৰ বিশেষ অভিযানকাৰী দলে চতিয়াৰ 15 নং ৰাষ্ট্ৰীয় ঘাইপথৰ ঘিলাধাৰী দলঙৰ সমীপত বাছ দুখন ৰাখি তালাচী চলায় ৷ আৰক্ষীৰ তালাচীত বাছ দুখনত অহা বিশ্বনাথ চাৰিআলিৰ বিতু ঘোষ আৰু বিহালীৰ মাচুম আলী নামৰ ড্ৰাগছ পেডলাৰ দুটা ধৰা পৰে ৷ আৰক্ষীয়ে ধৃত পেডলাৰ দুটাৰ পৰা ড্ৰাগছভৰ্তি দুটা কন্টেইনাৰ, ছিৰিঞ্জ জব্দ কৰে ৷ বৰ্তমান চতিয়া আৰক্ষীৰ জিম্মাত থকা পেডলাৰ দুটাৰ পৰা অধিক তথ্য আহৰণৰ বাবে আৰক্ষীয়ে জেৰা অব্যাহত ৰাখিছে।
প্ৰেৰক প্ৰণৱ ওজা