নিয়মীয়া বাৰ্তা, ২৭ ছেপ্টেম্বৰঃ গোৱালপাৰাৰ দৰংগিৰিত আজি গো-মাংস সৰবৰাহ কৰি গ্ৰেপ্তাৰ হ’ল দুই যুৱক৷ জানিব পৰা মতে নগৰবেৰাৰ পৰা মাজিপাৰালৈ AS-18-M-3793 নম্বৰৰ বাইকেৰে গো-মাংস সৰবৰাহ কৰি থকাৰ সময়তে দৰংগিৰি বজাৰত সন্দেহবশতঃ ৰাইজে সৰবৰাহকাৰী দুজনক কৰায়ত্ত কৰে। পিছত ৰাইজে সোধ-পোচ কৰাত গো-মাংস সৰবৰাহ কৰাৰ কথা স্বীকাৰ কৰে দুই যুৱকে। গো-মাংস সৰবৰাহকাৰী দুজন হ’ল দৰংগিৰি-চেঁচাপানীৰ মহিবুল ইছলাম আৰু আমিনুল ইছলাম। পিছত ঘটনাৰ সন্দৰ্ভত দৰংগিৰিৰ আৰক্ষীক খবৰ দিয়াত ঘটনাস্থলীত আৰক্ষীৰ লোক উপস্থিত হৈ দুয়োকে থানালৈ লৈ যায়। উল্লেখ্য যে নগৰবেৰা, চেঁচাপানী অঞ্চলৰ পৰা দৰংগিৰিৰ মাজেৰে নিয়মিতভাবে গো-মাংস সৰবৰাহ হোৱা বুলি ৰাইজে অভিযোগ উত্থাপন কৰিছে।
প্ৰেৰক বেনজিন বড়ো